DILI, 22 fevereiru 2022 (TATOLI)-Embaixadór Uniaun Eropeia (UE) iha Timor-Leste, Andrew Jacobs, hateten ekipa observadór hosi UE hamutuk 24 to’o ona Timor-Leste ho objetivu atu observa diretamente kampaña eleitorál ne´ebé sei realiza iha 2 marsu no eleisaun prezidensiál ne´ebé sei akontese iha 19 marsu.
“Ami kontinua observa eleisaun Prezidente Repúblika ida-ne’e to’o segunda volta”, dehan Embaixadór EU, Andrew Jacobs, ba Agência TATOLI, bainhira partisipa iha lansamentu relatóriu servisu prevensaun iha Timor-Leste, iha Otél Timor, Dili.
Nia informa, ekipa observador kompostu hosi análiza jurídiku, eleitorál, polítiku, rede sosiál, ofisiál imprensa nian, koordenadór ba observadór no lojístiku nian.
Hosi 24 observadór, feto na’in 12 no mane na’in 12 hosi nasaun 17 no lidera hosi Xefe Misaun Adjuntu, Alexandre Gray ne’ebé to’o iha Aeroporto Internacional Prezidente Nicolau Lobato, Comoro, Dili, ho aviaun Citilink oras 11:30.
Rekorda katak delegasaun Uniaun Europeia ne’ebé fahe ba ekipa tolu, ekipa dahuluk hamutuk na’in-neen mak to’o ona iha Timor-Leste iha fulan-janeiru no ekipa daruak iha ema na’in-ualu to’o iha 15 fevereiru.
Jornalista: Osória Marques
Editór : Zezito Silva
