DILI, 19 marsu 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten eleisaun prezidensiál 2022 atu hili kandidatu Prezidente Repúblika períodu 2022-2027 ne’e hahú hala’o sábadu (19/03) ohin.
“Ohin loron hahú vota no ohin loron ida-ne’ebé mak STAE lojistikamente to’o ona iha sentru votasaun nune’e husu ba eleitór hotu prepara-an no kuidadu-an, kuidadu ita-boot nia kartaun eleitorál atu nune’e ohin tuku 07h00-15h00 hodi hakbesik-an ba sentru votasaun ida-idak atu bele ezerse ita-boot nia direitu, tanba iha ne’ebá ofisiál eleitorál prepradu atende ita-boot sira,” Diretór STAE ne’e hateten ba salaun STAE, Dili.
Prezidente Komisaun Nasionál Eleisaun (CNE-sigla portugés), José AGostinho da Costa Belo, husu ba eleitór hotu-hotu atu hakbesik an ba sentru votasaun hodi ezerse direitu votu atu hili Prezidente Repúblika períodu 2022-2027.
“Ba povu tomak katak ita-nia eleisaun prezidensiál 2022 ne’e povu sei hili timor-oan ida sai Xefe Estadu bae ma hotu. Tanba ne’e hotu-hotu badinas hakbesik-an ba sentru votasaun atu ezerse ita-boot sira-nia direitu votu hahú tuku 07h00-15h00 lorokraik hodi ba líder ne’ebé ita-boot sira hakarak,” nia dehan.
Maibé, nia dehan, labele hanoin dehan to’o de’it iha tuku 15h00 lorokraik maibé bainhira eleitór ida mak forma nanis ona iha liña nia laran mak liu ona tuku 15h00 mak nia sei iha direitu atu kontinua vota bainhira laiha ona eleitór mak forma iha nia kotuk.
“Bainhira eleitór ida la mai forma iha liña nia laran depois liu tuku 15h00 lorokraik entaun nia labele ezerse sira-nia direitu votu iha biban ne’e,” nia hateten.
Tanba ne’e, nia husu ba ema hotu-hotu atu husik hela servisu hotu hodi hakat ba sentru votasaun ne’ebé mak imi rejista bá, atu ezerse direitu votu tanba vota ne’e tinan lima dala ida entaun votasaun ne’e importante.
Prezidente ne’e hateten, nia garante ba eleisaun prezidensiál 2022 ne’e tanba CNE nia ekipa iha sentru votasaun permanente hodi halo monitorizasaun hela no akompaña tabulasaun mai to’o nasionál.
“Ne’ebé ami sente eleisaun sei la’o di’ak tanba ita garante katak ho susesu no CNE nia supervizaun ne’e ba ema tomak nian no ema-nia votu ho rezultadu nafatin asegura,” nia garante.
Loron 19 marsu ne’e, nia hateten, hanesan Timor-Leste ne’ebé mak nasaun indenpendete presiza ema hotu nia kontribuisaun hodi hili lideransa ne’e ba ema hotu nian no labele halo diskriminasaun malu, tantu feto ka mane, hodi tau loloos ho rasionál no ho responsabilidade.
Jornalista : Osória Marques
Editór : Cancio Ximenes
