DILI, 23 juñu 2022 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) halo ona verifikasaun ba ajénsia viajen ida iha Dili tanba halo rekrutamentu ilegál timor-oan sira bá serbisu iha rai-li’ur.
“Ha’u simu duni lamentasaun balun, hafoin ha’u komesa halo verifikasaun maibé ha’u labele hateten sai entidade ne’e nia naran maibé sira viola duni tanba sira foti tiha sertifikadu A taka fali sertifikadu B, katak sertifikadu ne’ebé sira iha ne’e sertifikadu viajen, lei la permite atu lori sertifikadu viajen halo rekrutamentu,” Diretór Ezekutivu SERVE, I.P, Florêncio Sanches, informa ba Agência Tatoli, iha Timor Plaza, kinta ne’e.
Notísia relevante: Ajénsia Cammer PC fasilita timor-oan 4.000 serbisu iha Irlandia no Inglatera
Nia dehan, hafoin halo verifikasaun, ajénsia ne’e viola dekreu-lei númeru 34/2017 ne’ebé ko’alia kona-ba rekrutamentu, nune’e mós lei númeru 10/2017 kona-ba sosiedade komersiál.
Enkuantu, aktu ne’ebé ajénsia ne’e komete sei hetan penalidade ka multa mínimu $5.000 hosi SERVE no hosi instituisaun seluk mós sei iha tan.
“Ami sei aplika penalidade, dada fila lisensa, no lori ba Ministériu Públiku. Maibé seidauk, tanba SERVE presiza iha entidade ofisiál atu halo, tanba ami-nia knaar la’ós atu halo investigasaun maibé atu haree legalidade karik iha lamentasaun. Ha’u uza kompeténsia tomak ne’ebé lei atribui BA ha’u hodi halo verifikasaun no ha’u hetan katak ajénsia ida maka viola,” nia tenik.
Nune’e, Diretór Ezekutivu SERVE, I.P dehan, ba timor-oan sira ne’ebé mak hakarak ba pasiar de’it iha rai-li’ur bele, maibé ho intensaun atu bá serbisu ne’e labele.
“Husu boot ba joven sira katak ajénsia ruma halo rekrutamentu ba serbisu iha rai-li’ur kuandu la hatudu sertifikadu rekrutamentu hosi SERVE ne’e labele o tenki iha mós sertifikadu treinamentu hosi Institutu Nasionál Dezenvolvimentu Mão-de Obra (INDMO), kuandu laiha hotu maka nia viola lejizlasaun sira ne’e hotu,” nia hameno.
Jornalista : Antónia Gusmão
Editora : Julia Chatarina
