DILI, 07 jullu 2022 (TATOLI)–Ministru Edukasaun Juventude no Desportu (MEJD), Armindo Maia, husu ba Diretór foun na’in-tolu Instituto Nacional de Formação de Docentes e Profissionais da Educação de Timor-Leste (INFORDEPE), ne’ebé simu ona pose atu asume kargu ho responsabilidade.
“Ha’u hakarak hateten de’it katak, ita-boot na’in-tolu ne’ebé ohin asume kargu foun nu’udar Diretór ne’e hanesan oportunidade atu halo responsabilidade. Labele uza oportunidade ne’e nu’udar poder ida hodi halo konforme hakarak, maibé uza oportunidade hodi halo responsabilidade foun,” Minitru dehan iha serimónia solene tomada pose ba Diretór Nasionál sira, iha salaun Ian Martin, INFORDEPE, Balide, kinta ne’e.
Notísia relevante: UNTL-INFORDEPE planeia realiza graduasaun profesór baxarelatu 2.000 iha fulan-juñu
Diretór na’in-tolu ne’ebé simu ona pose maka hanesan Diretór Administrasaun Finansa INFORDEPE, Valente Xavier, Diretór Rejionál Sentru Rejionál ba Formasaun polo Baucau INFORDEPE, João da Costa Freitas, Diretór Nasionál no Koordenadór Gabinete Peskiza Dezenvolvimentu Monitorizasaun, Venâncio Tilman.
Tuir Ministru, bainhira funsionáriu ida hetan nomeasaun hodi asume knaar ida, hatudu katak nia hetan konfiansa, ne’ebé sei sai oportunidade di’ak ida hodi hala’o responsabilidade sira.
“Kargu ne’ebé tula iha dirijente foun na’in-tolu nia kaba’as, nu’udar responsabilidade ida luan no todan liu. Ha’u husu ba ita-boot sira ne’ebé maka simu ona pose, tenke asume ida-idak ninia kna’ar ho responsabilidade, tanba ne’e ha’u la fó parabéns, maibé ha’u fó de’it bom traballu,” nia akresenta.
Nune’e mós, Komisária Komisaun Funsaun Públika, Maria de Jesus Sarmento, konsidera, prosesu rekrutamentu to’o ba serimónia hatudu aktu seletivu tebes ba prosesu selesaun méritu
“Atu hateten katak prosesu ne’e la fasil, tanba bainhira loke prosesu konkursu, iha konkorrente barak maka atu kompete, quer dizer hatudu katak iha duni kompetisaun iha konkursu públiku,” nia tenik.
Tanba ne’e, pesoál na’in-tolu maka kompetente duni atu hala’o knaar durante tinan-haat tuir lei, maibé bainhira to’o iha dalan klaran maka iha buat ruma la’o la loos mak sei la to’o tinan haat.
“Karik buat di’ak ruma maka sira halo durante mandatu ne’e la’ós de’it tinan-haat, maibé bele aumenta tan,” nia dehan.
Diretór Administrasaun Finansa INFORDEPE emposadu, Valente Xavier, hateten, kargu foun ne’ebé nia simu hanesan buat baibain, tanba antes ne’e nia asume ona kargu sira iha diresaun hanesan.
“Hosi tinan 2000 mai to’o ohin loron, ha’u-nia fatin serbisu maka iha administrasaun. Antes ne’e iha administrasaun interna mós ha’u hanesan Xefe Gabinete Sekretaria Vise Ministra, hodi tau-matan ba finansa, hafoin muda fali ba administrasaun estatál no mai fali iha edukasaun, ikus mai kontinua nafatin knaar ida-ne’e, ne’ebé la’ós serbisu foun ida mai ha’u,” nia dehan
Jornalista : Tomé Amado
Editora : Julia Chatarina
