DILI, 25 jullu 2022 (TATOLI)—Governu liuhosi Autoridade Munisípiu Dili (AMD) tuir planu iha tinan ne’e sei reativa Programa Mão de Obra Postu Administrativu (PMOPA) iha postu administrativu Cristo Rei, Nain Feto, Dom Aleixo no Vera Crúz no Metinaro, hodi halo limpeza.
“Iha tempu badak, iha fulan-jullu, inisiu agostu ita hahú ona PMOPA iha postu lima hanesan iha Metinaro Cristo Rei, Nain Feto, Vera Crúz no Dom Aleixo,” Adjuntu Prezidente Autoridade Munisípiu Dili, António Moniz Clau, hateten ba Agência Tatoli iha nia kna’ar fatin, Díli, segunda ne’e.
Iha programa PMOPA ne’e, pesoál iha Postu Administrativu lima ne’e sei asesu ba limpeza iha estrada sira, liu-liu sira organiza iha sira-nia suku laran.
“Maibé, sira fleksivel bainhira ita presiza atu apoiu mai servisu tan iha área ne’ebé tuir munisípiu Dili haree katak presiza sira-nia apoiu, ita mobiliza sira mai apoiu,” nia dehan.
Diretora Finansas Administrasaun Munisípiu Dili, Ana Fernanda Junior, hateten ba programa PMOPA ne’e, Autoridade Munisípiu Dili prevee orsamentu liuhosi orsamentu retifikativu hamutuk $572,704.
Jornalista : Nelia Fernandes
Editór : Cancio Ximenes
