DILI, 29 jullu 2022 (TATOLI)—Embaixadora Plan Internasionál Timor-Leste (PITL), Cidália Lopes Nobre Guterres, enkoraja estudante Fundasaun Forum Komunikasaun Juventude (FFKJ) atu kontinua estuda no aprende hodi servi nasaun ne’e iha futuru.
“Husu ba oan sira atu estuda nafatin no esforsu tomak hodi bele akaba estudu tanba labarik mak futuru ba nasaun ida-ne’e no mós labarik mak sai susesu hodi bele servi família no nia nasaun ne’e. Ha’u husu nafatin ba imi hodi aprende no aprende tan,” Cidália Lopes hateten ba estudante sira hafoin halo vizita Fundasaun Forum Komunikasaun Juventude (FFKJ) iha Balide, Dili.
Aleinde ne’e, Embaixadora husu ba inan-aman sira hodi bele apoiu nafatin oan sira nune’e bele konklui nia estudu no bele goja nia vida labariknian no moris tomak hanesan mós labarik sira seluk.
“Ha’u haksolok tebes hateke sira-nia matan no haree sira-nia hamnasa katak sira hakarak eskola duni, hakarak atu eskola importante ita-nia apoiu ba sira,” nia dehan.
Nia dehan, kooperasaun sosiedade sivil ho Governu importante tebes atu bele hasai povu hosi ki’ak no mukit tuir ida-idak nia papel.
“Tanba iha momentu ne’ebá ha’u deside ho hau-nia gabinete hodi tau mós programa Gabinete de Apoio à Atividade Conjuge (GAAC) nian kada tinan tanba antes nu’udar espoza prezidente situasaun ne’e ha’u rona ona no ita haree iha mídia sosiál katak labarik barak mak para eskola iha dalan klaran ho rajaun oioin,” nia hateten.
Nune’e liuhosi programa ne’e labarik sira bele goza mós hanesan labarik sira seluk hahú hosi ne’e mak GAAK no FFKJ hametin di’ak liután kooperasaun no hodi realiza programa tolu (3) mak re-intrega labarik abandona sira ba fali nia eskola no halo uma ba inan faluk ida ho naran Rosalia ne’ebé ho oan na’in-lima (5) iha Tibar, munisípiu Liquiça.
Estudante Fundasaun Forum Komunikasaun Juventude (FFKJ), Dircia Soares, hateten, imi-nia prezensa mak bele motiva no enkoraja estudante sira hodi kontinua estuda no aprende.
“Ami iha esperansa katak loron ida ita sei hasoru fali iha tempu ne’ebé furak no iha ne’e ami sei sai fali hanesan fali ho ita-boot sira hodi tau matan fali ba ami nia maluk sira ne’ebé presiza hanesan ikan ne’ebé presija bee. Ami mós sempre presiza ita-boot sira tanba imi-nia prezensa mak ami-nia haksolok maske ami nafatin iha difikuldade, ami presija nafatin ita-boot sira,” Dircia haktuir.
Tanba ne’e, nia dehan, susesu ne’e la fasil maibé presiza esforsu no pasiénsia loron ruma sei iha rezultadu ne’ebé di’ak.
“Ami la promete atu sai susesu maibé ami fiar katak maromak nia planu ami bele susesu iha dalan saida de’it tanba ita hatene katak susesu la fasil bainhira ita tuur hein de’it tanba buat hotu ita ko’alia de’it la iha asaun sei la iha reasaun,” nia dehan.
Estudante FFKL ne’e hateten, aprende matéria la’ós matenek ona maibé oinsá atu komprende buat ruma.
“Dalaruma problema halo ami lakon vontade atu estuda no lakon esperansa atu estuda maibé ami hanoin fali katak iha ema di’ak barak hadomi tebes ami no hakarak suporta ami hodi hakarak haree ami-nia susesu ida-ne’e mak motiva ami hodi nafatin esforsu,” nia dehan.
“Maske problema barak maibé ami hanoin katak problema barak la’ós razaun taka dalan mai ami nia futuru no buat ne’ebé husik liu ona ita labele muda tempu maibé ita muda ita-nia an bainhira sei iha tempu,” nia hatutan.
FFKL mak oratóriu ONG nasionál ne’ebé mak halo programa tau matan ba labarik no foinsa’e sira-ne’ebé mak iha risku no pasa tempu iha dalan no hetan violasaun oioin.
Ezisténsia ONG Nasionál FFKJ ne’e hamriik iha tinan 1997 to’o mai ohin loron nafatin esforsu hodi hatán ba problema ne’ebé mak sosiedade Timor hasoru liu-liu problema sosiál no umanitária ne’ebé afeta ba família no labarik no difikulta labarik sira atu hala’o nia estudu no goja sira-nia direitu tomak hanesan labarik sira seluk iha nasaun demokrásia ida-ne’e.
Jornalista : Osória Marques
Editór : Cancio Ximenes
