VIQUEQUE, 26 agostu 2022 (TATOLI)--Xefe suku Dilor, postu administrativu Lacluta, munisípiu Viqueque, Jacinto Ximenes, konsidera polítika VIII Governu implementa programa ‘mão de obra’ postu administrativu (PMOPA) konsege benefisia komunidade hodi bele rekupera ekonomia.
“Ha’u sente Governu implementa programa ne’e bele benefisia komunidade hodi bele rekupera komunidade nia ekonomia. Durante pandemia komunidade sira labele halo negósiu, maibé ho programa sira-ne’e bele tulun,” Líder komunitáriu hateten ba Agência Tatoli via telefónika, sesta ne’e.
Ema ne’ebé hala’o atividade PMOPA, kada ema loron ida hetan $5 no xefe ekipa maka hetan $7 durante loron-20.
“Ha’u lahatene orsamentu ne’ebé aloka mai suku tanba postu sira mak halo pagamentu rasik, ha’u hatene maka direitu traballadór sira-nian,” nia akresenta.
Notísia relevante: MAE sosializa matadalan implementasaun PMOPA autoridade sira iha Viqueque
Durante implementasaun programa, traballadór ida-idak maka prepara rasik ekipamentu ba serbisu hanesan ai-suak, kanuru boot, katana no seluk tan.
“Ami laiha ekipamentu hodi uza ba serbisu, tanba ne’e ha’u fó hatene ita-nia komunidade bainhira mai hosi uma tenke lori rasik ida-idak ninia materiál. Ita labele hein de’it Governu lori ekipamentu maka foin uza hodi serbisu maibé fasilidade saida de’it mak ita iha, bele uza hodi halo serbisu,” nia tenik.
Suku Dilor implementa atividade 12 hosi PMOPA no envolve grupu hamutuk 12 ho totál traballadór 240, ne’ebé kada grupu iha ema 20.
Suku ne’e implementa atividade 12 hanesan normaliza dalan iha suku laran, kee dalan foun ba turizmu kulturál, limpeza iha vila laran, hamoos dalan públiku dirasaun Viqueque mai Dilor, limpeza iha fatin turizmu bee manas, hamoos fatin turizmu iha Niki Uma, halo lutu ba gruta, kuda ai hodi prezerva rai monu sira no hamoos semitériu Dilor.
Jornalista : Vitorino Lopes da Costa
Editora : Julia Chatarina
