VIQUEQUE, 27 setembru 2022 (TATOLI)–Diresaun Nasionál Transporte Terreste (DNTT) munisípiu Viqueque, hahú halo atendimentu karta kondusaun motoriza no karreta ba membru Polísia Nasionál Timor Leste (PNTL) iha munisípiu Viqueque, fulan oin.
“Ami hahú halo preparasaun karta kondusaun, maibé dahuluk ba membru PNTL sira ne’ebé seidauk iha karta kondusaun. Nune’e ami sei halo koordenasaun ho Komandante PNTL munisípiu no Komadante Tránzitu atu ami fó hanoin oinsá trata karta kondusaun ba membru sira ne’ebé laiha karta kondusaun,” Diretór Servisu Diresaun Nasionál Transporte Terrestre (DNTT) munisípiu Viqueque, Elvino da Cruz, hateten ba Agência Tatoli, hafoin ramata enkontru ho Xefe Tránzitu munisípiu Viqueque, iha edifísiu DNTT, Beloi, tersa ne’e.
Diretór ne’e konsidera, presiza atende uluk PNTL sira tanba DNTT serbisu ho instituisaun seguransa ne’e.
“Bainhira ita halo pasa revista ba komunidade, maibé ita rasik laiha karta kondusaun ne’e oinsá. Tanba ne’e, ita fó uluk atendimentu ba parte seguransa sira, hafoin ramata mak fó atendimentu públiku. Karta kondusaun ne’e iha ha’u-nia mandatu mak foin loke primeriu,” nia akresenta.
Notísia relevante: Laiha transporte, DNTT Viqueque seidauk prosesa dokumentu livreti 1.000 resin
Daudaun ne’e DNTT prepara matéria ba ezame karta kondusaun no fatin tama roda, ne’ebé sei prepara iha edífisiu Komandu munisípiu Viqueque.
Ezame teoria no prátika tama roda nian sei realiza hotu iha munisípiu Viqueque nune’e membru Polísia sira ne’ebé laiha karta kondusaun bele aproveita oportunidade hodi halo karta kondusaun.
Tuir planu, DNTT sei halo atendimentu ba ema hamutuk 1.000, maibé depende ba númeru Polísia sira.
Iha fatin hanesan, Xefe Seksaun Tránzintu munisípiu Viqueque, Salvador Guterres, hateten, Tránzitu munisípiu Viqueque rekolla ona membru Polísia sira ne’ebé seidauk iha karta kondusaun hamutuk 80, nune’e sira prontu atu halo teste karta kondusaun.
Jornalista : Vitorino Lopes da Costa
Editora : Julia Chatarina
