iklan

HEADLINE, MUNISÍPIU, VIQUEQUE

Laiha transporte, DNTT Viqueque seidauk prosesa dokumentu livreti 1.000 resin

Laiha transporte, DNTT Viqueque seidauk prosesa dokumentu livreti 1.000 resin

Diretór Servisu DNTT munisípiu Viqueque, Elvino da Cruz, hatudu hela dokumentu livreti ne'ebé seidauk prosesu, iha ninia knaar fatin, Beloi, tersa (27/09). Imajen Tatoli/Vitorino Lopes da Costa

VIQUEQUE, 27 setembru 2022 (TATOLI)—Diresaun Nasionál Transporte Terreste (DNTT) Viqueque seidauk konsege prosesa dokumentu livreti transporte pesoál hamutuk 1.000 resin tanba laiha transporte hodi transporta bá Dili.

“Ami durante ne’e hasoru difikuldade transporte, tanba ne’e ami seidauk prosesa dokumentu livreti hamutuk 1.000. Ami tenke lori bá Dili maka foin bele prosesa dokumentu,” Diretór Servisu DNTT munisípiu Viqueque, Elvino da Cruz, informa ba Agência Tatoli, iha ninia knaar fatin, Beloi, tersa ne’e.

Notísia relevante: DNTT Viqueque rekolla reseita $21.382 durante fulan-neen

Tuir Diretór, daudaun iha munisípiu labele prosesa dokumentu tanba laiha mákina imprime nune’e tenke ba DNTT Baucau no nasionál maka bele trata livriti.

Dokumentu livreti motorizada no karreta ne’ebé pendente hahú hosi tinan 2021 to’o 2022, ne’ebé daudaun rai hela iha DNTT Viqueque.

“Durante ne’e ami rezolve tula iha motorizada hodi lori oituan bá Baucau no Dili mak foin trata livreti,” nia akresenta.

Aleinde ne’e, DNTT Viqueque konsege rekolla taxa $4.812,50 iha fulan-agostu hosi atividade inspesaun, lisensa transporte públiku, troka naran no renova karta kondusaun, enkuantu taxa hosi fulan-janeiru to’o agostu $31.765.

Funsionáriu ne’ebé serbisu iha DNTT Viqueque humutuk na’in-21.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!