BAUCAU, 28 setembru 2022 (TATOLI) – Governu Japaun apoia reabilita uma kakuluk koléjiu Dom Bosco Fatumaca liuhosi fundu asisténsia ba seguransa umana ba komunidade.
Embaixadór Japaun iha Timor-Leste, Kinefuchi Masami, esplika, eskola iha koléjiu Dom Bosco Fatumaca durante eziste prodús ona lideransa sira iha área oinoin hanesan polítika, indústria, negósiu, siénsia edukasaun no enjeñaria ne’ebé iha tradisaun no reputasaun naruk.
“Ha’u sente onradu hodi kontribui hadi’a uma kakuluk eskola liuhosi ami-nia projeitu GGP,” nia hateten.
Projeitu GGP implementa iha Timor-Leste bazea ba realidade, liuliu kondisaun eskola aat hanesan iha koléjiu Dom Bosco Fatumaca ne’ebé orsamentu sei utliza hodi sosa materiál ho kualidade di’ak nune’e bele konklui ho másimu.
Embaixadór Japaun konsidera setór edukasaun sai baze fundamentál hodi determina futuru nasaun nian, liuliu nasaun dezenvolvimentu hanesan Timor-Leste tanba dezenvolvomentu rekursu umanu iha área siénsia no tékniku nesesáriu tebes hodi sai fatór prinsipál nasaun nian.
Diretór Koléjiu Fatumaca Dom Bosco Baucau, Padre Domingos Savio, SDB, agradese ba povu Japaun ne’ebé liuhosi programa GGP ka fundu asisténsia ba seguransa umana ba komunidade sira ne’ebé liuhosi embaxada Japaun iha Timor-Leste tulun ona hodi hadi’a uma kakuluk iha koléjiu refere.
“Obrigadu barak no ami apresia tebes ba tulun ida-ne’e,” Diretór Koléjiu Fatumaca Dom Bosco hateten iha Fatumaca, kuarta ne’e.
Koléjiu Dom Bosco Fatumaca nu’udar fatin aprenidijazen ba joven sira iha Timor-Leste no kada tinan sempre simu estudante sira hodi prepara ba futuru.
Programa GGP nia objetivu mak atu atinje dezenvolvimentu sósiu-ekonómiku bazea ba konseitu husi “Seguransa Umana” ne’ebé atu eleva bein-estár povu sira iha lokál ne’ebé Koléjiu Dom Bosco Fatumaca sai mós hanesan benefisiáriu ida hosi programa refere ho tótal orsamentu hamutuk $ 90.909.
Koléjiu Fatumaca nu’udar unidade relijioza ne’ebé hala’o serbisu prinsipál hanesan asisténsia espiritúal ba sarani sira, agrikultura no atividade estudu ho tótal hamutuk salesianu na’in-19, ne’ebé daidaun ne’e hala’o kna’ar iha fatin refere kompostu Padre na’in-hitu, irmaun seniór na’in-tolu no irmaun juniór na’in-sia.
Koléjii refere jere eskola téknika vokasionál ho tótal estudante hamutuk na’in-213, kompostu Josi mane 203 no feto na’in-3 no estudante.asales ne’ebé estudu ba Padre hamutuk na’in-73 no iha profesór hamutuk 24.
Alende ne’e iha sentru treinamentu ba joventude sira ho tótal estudante hamutuk na’in-50 no jere tán ensinu báziku ho ninia filiál hamutuk 13 ho tótal estudante hamutuk 1.600-resin.
Serimónia refere partisipa hosi embaixadór Japaun iha Timor-Leste, Kinefuchi Masami, autoridade munisipál Baucau, Diretór Servisu Munisipál Edukasaun Baucau, Augosto Ximenes Ornai no Diretór Jerál Ministeiru Edukasaun Juventude no Desportu (MEJD), Raimundo José Neto.
Jornalista : Natalino Belo
Editór : Evaristo Soares Martins
