DILI, 03 setembru 2022 (TATOLI)—Eis Diretór Servisu Edukasaun Munisípiu Dili, Duarte Braganza, informa, nia parte konklui ona asina diploma formál estudante finalista 1.500 iha nível ensinu sekundáriu jerál no tékniku vokasionál iha Dili tinan 2021.
“Maski prosesu asina diploma estudante finalista sira lori tempu naruk, maibé ha’u asina hotu ona tanba ha’u lakohi halo ita-nia estudante sira kontinua sai vítima,” Eis hateten ba Agência Tatoli, via telefónika, segunda ne’e.
Nia dehan, maski finaliza ona serbisu maibé nia kontinua komunika ba parte Ministériu Edukasaun Juventude no Desportu (MEJD) tanba serbisu ne’e lori tempu naruk.
“Ha’u aprezenta ona relatóriu ba ministru nu’udar superiór atu labele haluha promesa tanba serbisu sira ne’e la’ós ha’u-nia kompeténsia maibé tanba responsabilidade ha’u kontinua kumpre no ohin konklui ona diploma sira,” nia tenik.
Notísia relevante: Duarte Braganza garante fulan-ne’e sei konklui asina diploma estudante finalista 1.500
Antes ne’e, Ministru Edukasaun Juventude no Desportu, Armindo Maia, promete ona ba eis Diretór ne’e, katak iha tempu besik nia sei hato’o liafuan ruma relasiona ho promesa sira ne’ebé antes ne’e ko’alia ona.
“Ha’u sei hato’o fali liafuan ruma ka resposta balun ba ita-boot,” Ministru dehan.
Eis Diretór Servisu Edukasaun Munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível sekundáriu jerál no tékniku vokasionál tinan 2021 uza sira-nia naran.
Mandatu Duarte Braganza loloos termina iha loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva, nu’udar Diretór Servisu Edukasaun Munisípiu Dili foun.
Tinan 2021, iha estudante finalista 21.567 iha territóriu tomak mak termina ona estudu iha nível sekundáriu jerál no tékniku vokasionál.
Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante ensinu báziku 31.143, ensinu sekundáriu 22.223, ensinu sekundáriu tékniku vokasionál 4.858, enkuantu hosi Dili de’it iha totál estudante 16.752.
Nune’e, iha loron 20 janeiru 2022, MEJD anunsia rezultadu ezame nasionál hosi eskola ensinu báziku no ensinu sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante ensinu báziku 31.143 no ensinu sekundáriu 22.223.
Jornalista : Tomé Amado
Editora : Julia Chatarina
