iklan

EDUKASAUN, HEADLINE

Duarte Braganza garante fulan-ne’e sei konklui asina diploma estudante finalista 1.500

Duarte Braganza garante fulan-ne’e sei konklui asina diploma estudante finalista 1.500

Eis Diretór Servisu Edukasaun Dili, Duarte Braganza. Imajen Tatoli/Francisco Sony

DILI, 08 setembru 2022 (TATOLI)–Eis Diretór Servisu Edukasaun Munisípiu Dili (DSEMD), Duarte Braganza, garante fulan-ne’e nia laran sei konklui asina diploma estudante finalista 2021 hamutuk 1.500, nune’e bele distribui ona.

“Ha’u garante fulan-ne’e ramata ha’u sei asina hotu ona diploma estudante finalista sira-nian tanba iha ona konkordánsia entre Ministériu Edukasaun Juventude no Desportu (MEJD) no ha’u,” Eis Diretór informa ba Agência Tatoli, via telefónika, kinta ne’e.

Diploma estudante sira ne’ebé seidauk asina hosi eskola neen iha Dili hanesan Eskola Ensinu Báziku Sentrál (EBC, sigla portugés) Hera, EBC Metinaro, EBC Bikeli, EBC international school Vila Verde, EBC Petisaun no Ensinu Sekundáriu Jerál (ESJ) FINANTIL.

Notísia relevante: Estudante 3.000 resin hosi eskola haat seidauk hetan diploma

Duarte Braganza dehan, nia parte prontu kontribui no kolabora ho dirijente sira iha MEJD tanba hetan ona konkordánsia iha prosesu servisu asina diploma.

“Ha’u hetan ona konkordánsia ida ho Koordenadór Unidade Kurríkulu Nasionál, katak bainhira ha’u asina hotu mak sei aprezenta relatóriu ba ministériu mak foin bele prosesa atu halo re-embolsa,” nia tenik.

Maski nune’e, eis Diretór ne’e seidauk hatene klasifikasaun dadus diploma hosi eskola neen tanba to’o agora nia seidauk simu diploma.

“Ha’u bele halo de’it estimasaun ida katak diploma ne’ebé seidauk hetan asinatura hamutuk 1.500, ho nune’e kuandu konklui hotu ona bele haruka ona ba eskola sira hodi distribui ba estudante iha eskola neen,” nia dehan.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!