BAUCAU, 17 outubru 2022 (TATOLI) – Pesoál saúde hamutuk na’in-50 hosi munisípiu tolu tuir refreshing Training hosi Rotary International durante loron rua iha sentru saúde Baucau.
Espesialista OBSTETRA (kandungan) hosi Rotary International, Jeremy Dats, esplika, objetivu atu fó hanoin ba profisionál saúde sira oinsá atu halo atendimentu ba bebé bainhira partu iha fasilidade saúde no inan isin-rua ne’ebé hetan moras hanesan tensaun.
“Ami tau importante liu ba kondisaun ne’ebé mak afeta grave ba inan isin-rua no bebé, ezemplu inan ne’ebé mak hetan sangra ka pendarahan durante isin-rua, liuliu ne’ebé mak atu partu maibé hetan tensaun aas no prevene inan isin-rua ho nia bebé hetan komplikasaun,” espesialista OBSTETRA (Kandungan) Rotary International Austrália, Jeremy Dats, hateten iha Vila Antiga, segunda ne’e.
Liuhosi refreshing training hanesan parte atu fó hanoin ba profisionál saúde sira oinsá hala’o sira-nia kna’ar ho profisionál hanesan tratamentu ba inan isin-rua ho bebé inklui moras komplikasaun ne’ebé enfrenta hosi inan ho oan hodi evita taxa mortalidade iha futuru.
Partisipante, Deonísia Amaral sente kontente hetan oportunidade partisipa iha formasaun ne’e tanba bele fó hanoin ba profisionál saúde hotu atu oinsá halo atendimentu ba inan ho oan iha fasilidade saúde molok no depois partu.
“Importante tanba refreshing training ne’e atu fó hanoin mai ami atu kuidadu bebé sira-ne’ebé foin moris no inan isin-rua sira-ne’ebé mak atende iha ami-nia fasilidade saúde,” Deonísia hateten.
Atividade refreshing training hala’o durante semana-ida, hahú segunda to’o sesta (17-21 outubru), ne’ebé mai hosi doutór no parteira hosi munisípiu tolu kompostu Baucau, Lautém no Viqueque hamutuk na’in-50.
Jornalista : Natalino Belo
Editór : Evaristo Soares Martins
