DILI, 28 outubru 2022 (TATOLI)—Governu introdús medida 22 iha Orsamentu Jerál Estadu (OJE) 2023, ne’ebé ho lema ‘investimentu produtivu no kresimentu inkluzivu ba jerasaun futuru’.
“Governu elabora Proposta OJE 2023, ne’ebé aprezenta distribuisaun rekursu nasionál justu no ekuitativu hodi mellora prestasaun servisu, rekuperasaun ekonómiku no reziliénsia, promove kresimentu ekonómiku ne’ebé inkluzivu no sustentável iha médiu prazu,” refere nota ne’ebé Agência Tatoli asesu, sesta ne’e.
Medida hirak ne’e mak hanesan saláriu ba funsionáriu ou administrasaun públika millaun $445, asesu ba eletrisidade nasionál no enerjia renovável ho eskala kiik millaun $118, asegura protesaun sosiál ba veteranu sira millaun $103, fundu rezerva kontinjénsia millaun $66, diversifikasaun ekonomia millaun $25, programa merenda eskolár millaun $22,4, programa bolsa da mãe jerasaun foun millaun $19,2, fundu dezenvolvimentu kapitál umanu millaun $18, konstrusaun, reabilitasaun no manutensaun estrada no ponte sira iha área rurál millaun $17, no eleisaun parlamentár millaun $16.
Notísia relevante: Governu aprova programa integra iha proposta OJE 2023
Nune’e mós, konkordata ho konferénsia episkopál Timor-Leste millaun $15, konstrusaun estrada nasionál Pante Makasar millaun $15, sosa asaun (saham) Timor Telecom millaun $14,5, programa pre-eskolár millaun $12,1, programa nutrisaun ne’ebé mai hosi inisiativa Prezidente Repúblika millaun $10, eleisaun Suku millaun $10, reabilitasaun estrada munisipál entre Laga no Baguia millaun $7,8, promove produsaun nasionál millaun $6,4, apoiu orsamentu ba relijiaun la’ós katólika millaun $5, ba sistema irrigasaun Laivai millaun $3,6 no irrigasaun Galata millaun $2,6, bolsa estudu ba oan kombatente no mártires libertasaun nasionál millaun $1,7, no apoiu ba integrasaun sosiál no reabilitasaun ba ema ho defisiénsia sira millaun $1,4.
Proposta Orsamentu ne’e formula bazeia mós ba Objetivu Estratéjiku VIII Governu Konstitusionál ne’ebé atu fornese sidadaun hanesan oportunidade atu iha moris saudável, seguru no moris naruk, asesu ba konesimentu, teknolojia no inovasaun, no asesu ba rekursu sufisiente hodi garantia moris dignu.
Proposta OJE tinan ne’e ho despeza globál $3.155.715.306, kompostu hosi despeza ba administrasaun sentrál $2.800.000.000, seguransa sosiál $235.715.306, no Rejiaun Administrativa Espesiál Oé-cusse Ambeno (RAEOA) $120.000.000.
Tetu agregadu administrasaun sentrál $1.800.000.000 esklui ona fundu kombatente libertasaun nasionál (FKLN) $1.000.000.000, seguransa sosiál millaun $235.715.306 no RAEOA $120.000.000.
Jornalista : Antónia Gusmão
Editora : Julia Chatarina
