DILI, 28 dezembru 2022 (TATOLI)—Prezidente Repúblika (PR), José Ramos Horta, kuarta ne’e, ho delegasaun dezloka ona ba Brazíl hodi partisipa serimónia tomada pose Prezidente Repúblika Brazíl, Luis Inácio Lula da Silva.
Notísia Relevante: PN autoriza viajen PR Horta ba Brazíl no Suísa
“Hanesan ita hatene, ohin, ha’u arranka ba Brazíl viajen naruk tebe-tebes hodi ne’e ba Bali, no Doha, Dubai ba Lisboa depois ho Prezidente Portugés hamutuk aviaun ba Brazíliatuir tomada de pose Prezidente Brazíl Lula iha 01 janeiru,” PR Horta hateten ba jornalista sira antes dezloka ba Brazíl iha aeroportu internasionál Nicolau Lobato Comoro, kuarta ne’e.
Xefe Estadu hateten, primeiru Brazíl importante ba Timor-Leste no daruak Prezidente Repúblika Lula nia mós ema ida erói tempu liubá sai vítima persegisaun podér judisiál iha Brazíl kontra nia.
“Ha’u momentu ne’ebá ko’alia sai denúnsia manipulasaun justisa Brazíl kontra nia afinál depois ha’u iha razaun no juis ida halo persegisaun polítika ba nia sira duni sai nia hodi poder judisiál no taka tiha kazu no nia eleisaun fila-fali hetan terseiru mandate,” Horta dehan.
Brazíl iha relasaun metin loos ho Indonézia, India, Afríka Súl, Xina no sira hola parte bloku ida, nune’e Horta hakarak dezenvolve relasaun makaas liután ho Brazíl iha área sientífika, agrikultura dan edukasaun.
Nune’e aproveita viajen ne’e partisipa iha serimónia pose aliened iha mós ajenda enkontru bilaterál ho Prezidente Lula iha 02 janeiru, ho enkontru seluk no iha 03 janeiru fila mai Timor-Leste.
Jornalista : Nelson de Sousa
Editór : Cancio Ximenes
