DILI, 08 Jullu 2026 (TATOLI) – Isin bele mate. Maibé, liafuan la mate. Hanesan anin-moris huu maus ne’ebé naksulin husi foho-tutun aas liu iha Timor, nakonu ho vertude no domin kle’an ba rain-moris, Saudozu Antigu Prezidente Repúblika, Francisco Guterres “Lú Olo”, husik hela ninia lia-menon jenuínu nu’udar eransa klamar nian, liliu ba Ajénsia Notisioza TATOLI nian.
“Ha’u fiar katak maluk jornalista sira-neʼebé servisu iha TATOLI, hatene saida mak étika profisionál no sei hadi’a-an ba beibeik iha aspetu tékniku no koñesimentu, atu hato’o beibeik informasaun loos no kle’an, ho kualidade aas, hodi hetan fiar ba beibeik husi ita-nia povu no komunidade internasionál,” Antigu Prezidente Parlamentu Nasionál hateten, iha dokumentu ofisiál ida ba TATOLI, bainhira sei asume knaar nu’udar prezidente repúblika, iha nia moris.
Husi trinxeira istória nian: Luta naroman nian dezde 1975
Tuir Saudozu Lú Olo, refere iha dokumentu ofisiál ne’e katak ideia atu kria netik naroman komunikasaun nian liuhusi Ajénsia Notisioza ida, la’ós foin mosu ohin, maibé nia abut moris kedas husi raan, terus, no sakrifísiu funu nian iha tinan-1975. Iha tempu ne’ebá, mosu mehi ida ho naran ETNA (East Timor News Agency). Jornalista australianu, Roger East, mai rai-laran hodi hakoak mehi ne’e ho domin atu ajuda harii dalan ba lian lia-loos nian, maibé nia moris lakon iha ‘nakukun terus’ nian iha Dezembru 1975.
Istória kbiit nian ne’ebé hakerek ho klamar funu nian, haktuir fali husi Saudozu Lú Olo:
“Tanba kondisaun funu, ita la konsege harii Ajénsia iha rai-laran maibé ita konsege fó-sai informasaun kona-ba luta libertasaun nasionál liuhusi Rádio Maubere ba belun australianu Denis Freney, iha Sydney, no nia mak hato’o notisias ba Frente Esterna no komunidade internasional. Hafoin lakon Rádio Maubere, ita hetan fali dalan seluk hodi hato’o notísia ba rai-li’ur,” Lú Olo dehan.
TATOLI: Fini foun ne’e buras no haklaken ba povu
Hanesan mós nasaun seluk ne’ebé hamriik ho dignidade, soberanu, Timor-Leste iha kanál ofisiál ida, hodi hato’o informasaun Estadu nian ba povu tomak no ba komunidade internasionál.
Maski nia pasu no otas sei nurak duni, TATOLI hatudu ona katak iha ninia fuan inklui nia laran, iha fini esperansa nian ne’ebé nakloke ba mundu:
“Maski otas sei nurak, TATOLI hatudu daudaun ona esforsu atu habelar informasaun ba públiku, iha ita-nia lian ofisiál rua, Tetun no Portugés. Ho servisu informativu ida ne’e, TATOLI ajuda órgaun komunikasaun sira seluk haklaken ita-nia ema no nune’e, enkoraja povu atu partisipa iha prosesu foti desizaun no dezenvolvimentu nasionál,” Saudozu Lú Olo hateten.
Lia-menon hirak-ne’e hela nafatin nu’udar sasin moris ne’ebé jenuínu. La’ós de’it memória horseik nian maibé mós domin ne’ebé naksulin husi tempu lansamentu embriaun ANTIL/TATOLI, hodi tulun no fanu nafatin espiritu jornalista sira-nian atu tane aas liután lia-loos, étika, no kualidade, nu’udar kbiit no pilár foun ba independénsia no dezenvolvimentu nasionál.
Notísia relevante:Ezisténsia tinan 10, Tatoli presiza hametin konfiansa públika no adapta ba era dijitál
Jornalista: Osória Marques
Editór: Rafael Ximenes de A. Belo
