DILI, 03 janeiru 2023 (TATOLI)—Diretór Jerál Administrasaun no Finansa, Ministériu Solidariedade sosiál no Inkluzaun (MSSI), Rui Manuel Gago Exposto, informa to’o ohin loron pagamentu subsídiu fim do ano subsídiu $200 ba uma kain ne’ebé seidauk finaliza mak iha Dili no Rejiaun Administrativa Espesiál Oé-cusse Ambeno (RAEOA) tanba númeru benefisiáriu barak.
Notísia Relevante: Governu halo ona pagamentu subsídiu $200 ba uma kain 295.300
“Pagamentu subsídiu fim do ano nian seidauk remata, sei hala’o hela iha prosesu nia laran, liu-liu iha Dili maki ha suku Comoro no Rejiaun Administrativa Espesiál Oé-cusse Ambeno, tanba iha benefisiáriu barak,” Rui Manuel Gago Exposto hateten ba Agência Tatoli liuhosi WhatsApp, tersa ne’e.
Ekipa pagamentu subsídiu fim do ano $200 ba uma kain iha territótiu nasionál nian ne’e sei konklui iha loron tolu oin mai, maibé pagamentu iha suku Comoro no iha RAEOA ne’e iha semana ida-ne’e.
Tuir dadus, uma-kain hamutuk 339.954 mak sai benefísiáriu ba subsídiu fim do ano $200 ba uma kain nian.
To’o loron 01 fulan-janeiru tinan 2023, ekipa pagamentu MSSI nian selu ona família 302,764, ekivalente ho 89% ho montante millaun $60-resin hosi totál osan alokadu $67.990.800.
lha dekretu-lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu liuo na $500 ne’e labele simu .
Jornalista : Osoria Marques
Editór : Cancio Ximenes
