DILI, 28 dezembru 2022 (TATOLI)–Koordenadór Jerál Sekretáriu Tékniku Pagamentu Subsídiu Fim do Ano $200 ba Uma Kain, João Coimbra, informa Governu liuhosi ekipa pagamentu hosi Ministériu Solidariedade Sosiál no Inbkluzaun (MSSI) to’o oras ne’e halo ona pagamentu ba uma kain 295.300 iha territóriu nasionál ho orsamentu $59.955.400.
Notísia Relevante: Uma-kain 285.825 iha territóriu hetan ona pagamentu subsídiu $200

“To’o ohin (kuarta, 28 dezembru) lorokraik ne’e, pagamentu halo ona ba Uma Kain hamutuk 295.300 ho nia orsamentu $59.055.400 hosi totál uma kain 339.954, hosi totál ne’ebé sei presiza atu selu hamutuk 44.654. Agora, osan sei hela $8.935.400 ne’e hosi osan $67 990 800,” nia dehan ba Tatoli liuhosi WhatsApp, kuarta ne’e.
Ekipa pagamentu sei kontinua halo pagamentu liu-liu iha Dili mak hanesan suku Comoro, Bairru Pite no suku seluk ne’ebé uma kain barak sei kontinua selu hela.
“Iha inísiu loloos hotu iha 23 dezembru, maibé tanba kestaun téknika hanesan transferénsia fundu atraza uitoan, no levantamentu iha nivel postu administrativu so bele hahú iha 12 to’o 15 dezembru liubá tanba levantamentu fundu iha nivel postu administrativo sira tarde. Nune’e, implika mós prosesu pagamentu,” nia esplika.
Tékniku sira iha terrenu halo hela esforsu atu finaliza pagamentu ba uma kain 44.654, no parte sekretariadu MSSI nian akompaña hela hodi haree molok hola medida ruma.
Husu kona-ba lista reklamasaun, nia dehan, desde inísiu teknikamente la ko’alia kona-ba reklamasaun tanba instrumentu legál ne’ebé uza hanesan baze la ko’alia kona-ba reklamasaun.
lha dekretu-lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu liuona $500 ne’e labele simu.
Jornalista : Osoria Marques
Editór : Cancio Ximenes