COVALIMA, 10 janeiru 2023 (TATOLI)–Komandante PNTL munisípiu Covalima, Superintendente Polísia Basílio de Jesus, entrega motorizada hitu (7) ba komandante eskuadra iha postu administrativu hitu iha Covalima.
“Ohin ita entrega motorizada hitu (7) ba komandante eskuadra hitu (7) iha munisípiu Covalima, hodi fasilita sira hala’o servisu iha postu administrativu sira ho di’ak,” Superintendente Polísia Basílio de Jesus hateten ba jornalista sira, iha komandou PNTL, Santa Rosa, tersa ne’e.
Motorizada hirak ne’ebé entrega ba komadante eskuadra sira-ne’e, hetan apoiu hosi komandu jerál PNTL atu fasilita eskuadra sira bele hala’o sira-nia servisu di’ak liután.
“Tanba ita hotu hatene katak distánsia ita-nia eskuadra iha Covalima kuaze do’ok no mós haree kondisaun estrada defisil tebes. Durante tempu naruk, ita-nia Estadu konsege entrega ona motorizada ba komandante eskuadra, maibé agora konsege ona entrega motorizada ba kada komandante eskuadra sira,” nia dehan.
Komadante ne’e hateten, ho apoiu hosi kamandu jerál PNTL ba komandante eskuadra sira bele fasilita hala’o sira-nia servisu bele halo movimentu hosi munisípiu ba eskuadra bele apoiu sira-nia servisu ho di’akliu
Regra atu utiliza motorizada ida-ne’e hanesan motor Estadu no patrimónia Estadu, nune’e komandu sei kontrola no halo manutensaun uza konvustível Estadu.
“Mekanizmu atu kontrola, komandu orienta komandante eskuadra sira tenke kontrola motorizada ne’ebé sira-uza, labele halo modifikasaun no tenke hatene tempu manutensaun,” nia hateten.
Motorizada hitu ne’e komandante entrega ba komandante eskuadra sira hosi postu administrativu Fatululik, Fatumea, Maucatar, Tilomar, Suai, Zumalai no Fohorem.
Jornalista : Celestina Teles
Editór : Cancio Ximenes
