OÉ-CUSSE 13 fevereiru 2023 (TATOLI) – Diretór Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA), Cândido dos Reis Amaral, informa, situasaun udan difikulta projetu ba ponte alternativa unidade rua, ponte Noetoko lokaliza iha suku Ban-Afi, sub-rejiaun Nítibe no ponte Bitopa iha suku Usitasa’e, sub-rejiaun Oésilo.
Tuir nia, maske situasaun udan maibé kompañia sira hahú mobiliza ona materiál konstrusaun hosi rai-li’ur, no daudaun ne’e preparadu ona iha Oé-Cusse, maibé tanba situasaun udan, entaun servisu fíziku seidauk la’o ho másimu.
“Ponte Noetoko, sira halo ona servisu progresu fíziku 15% ba servisu protesaun ponte ne’e rasik, no mós servisu ne’ebé maka la afeta hosi udan, sira halo ona servisu, ba ponte Bitopa ita hatene daudaun ne’e sei akumula bee barak tanba udan, entaun sira seidauk bele servisu másimu, maibé sira hahú daudaun servisu balu hodi hein bainhira udan para, sira bele tama ona servisu fíziku loloos,” Cândido Amaral, hatete iha Oé-Cusse, segunda ne’e.
Nia fundamenta, dezde projetu rua ne’e halo ona lansamentu iha fulan-novembru 2022, parte DRI liuhosi servisu ponte no estrada kontinua halo fiskalizasaun rútina, kona-bá ezekusaun projetu ne’e rasik.
Tanba mobilizasaun materiál hosi kompañia ba konstrusaun ponte rua ne’e garantidu, no iha ona Oé-Cusse, maibé tanba udan progresu servisu atraza, nune’e bainhira udan para, hahú tama ona servisu fíziku.
“Ami-nia servisu, tenke halo monitorizasaun rútina, ba haree atu hatene sira hasoru problema ruma ka lae servisu la’o oinsá, maibé atu garante katak, kompañia kumpre nafatin kontratu mezmu ita iha situasaun udan, ha’u hanoin la fasil, maibé DRI liuhosi servisu ponte no estrada tenta atu halo komunikasaun nafatin ho parséria sira nune’e, servisu ne’e bele la’o nafatin, tanba materiál preparadu,” nia katak.
Diretór Cândido, afirma, obra públika, kontinua promove liña koordenasaun ho kompañia kona-bá preparasaun ba materiál, no traballadór, nune’e bainhira tama ona ezekuzasaun ba projetu bele garantia no la’o ho susesu.
Entretantu, konstrusaun ponte Bitopa hahú halo lansamentu iha novembru 2022, ezekuta hosi empreza Am-Lhichoe Unipesoál Lda, ho valór kontratu hamutuk $406,945.00, ne’ebé Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu fulan-haat.
Nune’e mós konstrusaun ponte Noetoko inklui ponte ki’ik rua iha aldeia Neofmetan, suku Ban-Afi, halo lansamentu iha fulan-novembru, ezekuta hosi empreza Lifau Indah Unipesoál Lda ho valór kontratu $625,451.54, ne’ebé Autoridade RAEOA prevee hosi Orsamentu Jerál Estadu (OJE) 2022 ho durasaun servisu durante fulan neen.
Jornalista : Abílio Elo Nini
Editór : Evaristo Soares Martins
