DILI, 14 fevereiru 2023 (TATOLI) – Órgaun Liga Futeból Timor-Leste (LFTL) finaliza ona rejistrasaun ba jogadór no klube sira atu partisipa iha liga époka 2022-2023.
LFTL hahú loke janela transferénsia ba klube sira iha janeiru fulan kotuk no termina iha 10 fevereiru foin lalais no iha 12 fevereiru órgaun liga halo ona technical meating ba klube sira hodi dada kedan sorteiu no klube rua Aitana FC no FC Porto Taibessi mak sei joga hasoru malu iha abertura ne’ebé sei akontese 17 fevereiru mai ne’e iha Estádiu Munisipál Dili tuku 16:00 loraik otl to’o remata.
“Ita finaliza ona rejistrasaun ba lista jogadór no klube hamutuk 17 mak sei partisipa iha liga ne’e, klube sira ne’e mak primeira divizaun sia kompostu hosi, Aitana FC, Porto Taibessi FC, Atletico Ultramar, Emanuel FC, Assalam FC, AD SLB Laulara, AS Ponta Leste, Karketu DILI FC no Academica FC. Segunda divizaun mak kompostu hosi, Kablaki FC, Lica-Lica Lemorai FC, AS Marca FC, Santa Cruz FC, FIEL FC, Zebra FC, Nagardjo FC no DIT FC” Asistente Verefikasaun no lisensa LFTL Felisberto de Jesus, dehan ba Agência TATOLI iha Estádiu Dili, ohin.
Nia dehan, klube sira priénse hotu kritéria ne’ebé mak LFTL fó sai kada klube ida iha primeira divizaun rejistu jogadór hamutuk na’in 27, segunda divizaun rejistu na’in 30.
“Klube sira mai ne’e tuir saida mak liga fó sai ona, iha ne’e jogadór ba primeira divizaun klube ida tenke iha de’it 27 segunda divizaun iha 30 ne’e sira kompleta ona”, Felisberto dehan.
Totál jogadór ne’ebé atu partisipa iha liga époka ne’e lokál no internasionál iha primeira divizaun no segunda divizaun 17 ne’e hamutuk na’in 483, hosi númeru ne’e jogadór lokál hamutuk na’in 455 no estranjeiru hamutuk na’in 28 hosi jogadór estranjeiru hirak ne’e na’in 21 joga iha primeira divizaun no na’in hitu joga iha segunda divizaun.
Jornalista:Hortencio Sanchez
Editór : Zezito Silva
