DILI, 21 fevereiru 2023 (TATOLI)—Konfederasaun Sindikatu Timor-Leste (KSTL) ezije ba Governu atu kria Dekretu-Lei kona-ba saláriu mínimu antes mandatu ramata.
Notísia Relevante: Governu propoin saláriu mínimu sa’e ba $135
Sekretáriu Jerá KSTLL, Etelvina Sarmento, hateten saláriu mínimu ne’e fatór determinante ida ba hadi’a moris família nian, atu nune’e bele analiza aspetu sosiál hanesan ki’ak, má nutrisaun, traballu infantile no seluk tan.
“Ministru Koordenadór Asuntu Ekonómiku tenke aselera proposta Konsellu Nasionál Traballu. Saláriu mínimu tenke bazeia ba proposta Konsellu Nasionál Traballu ne’ebé aprezenta iha tinan 2020. Ami husu ba Governu atu aprova Dekretu-Lei, molok remata mandatu, “nia hateten iha konferénsia imprensa, iha Bemori, tersa ne’e.
Tuir Diretora, Konsellu Nasionál Traballu mak iha kompeténsia atu propoin saláriu mínimu, tanba ne’e Governu labele determina saláriu mínimu ba traballadór sira, ida-ne’e nu’udar responsavél ba diálogu sosiál no konsertasaun entre parseiru sosiál sira, nia fó konsellu kona-ba elaborasaun polítika no lejizlasaun kona-ba serbisu, propoin saláriu mínimu nasionál no funsaun sira seluk ne’ebé lei atribui ba nia.
Hasoru preokupasaun ida-ne’e, Konsellu Nasionál Traballu propoin saláriu mínimu kada fulan $150 ba traballadór sira. Reprezentante ne’e konsidera lei nu. 8/2022, loron 15 fulan-Junu, kona-ba opsaun boot sira hosi planu ba tinan 2022, prevee saláriu mínimu ho valór $135, ne’ebé hanesan de’it polítika Governu nian maibé Konsellu Nasionál Traballu tenke propoin determinasaun atu halo revizaun ba saláriu mínimu.
Diretór Jerál Sekretaria Estadu formasaun profisionál no Empregu (SEFOPE), Paul Alves, rekoñese katak presiza Dekretu-Lei ida atu reforsa determinasaun saláriu mínimu ba traballadór sira.
“Ami aprezenta ona proposta-lei ida ba Ministériu Koordenadór Asuntu Ekonómiku, ami hein katak sei hetan aprovasaun,” nia dehan.
Nia esplika katak saláriu mínimu tenke selu ba traballadór sira tuir evolusaun ekonómia no sosiál nian.
Notísia Relevante: Ministru Finansa konsidera revizaun saláriu mínimu implika monetáriu OJE
Jornalista : Osória Marques
Editór : Cancio Ximenes
