DILI, 22 Maiu 2026 (TATOLI)—Reitór no estrutura atuál Universidade Nacional Timor Lorosa’e, Juviano António da Costa, hala’o enkontru ho Primeiru-Ministru, Kay Rala Xanana Gusmão, hodi atualiza planu no programa prioridade durante sira-nia mandatu no ba tinan tuir mai.
Notísia Relevante: Reitór foun UNTL simu ona pose
Reitór Universidade Nacional Timor Lorosa’e (UNTL), Juviano António da Costa, hateten objetivu prinsipál ba ami-nia sorumutu hodi aprezenta estrutura reitór UNTL atuál ba Primeiru-Ministru, Kay Rala Xanana Gusmão.
“Estrutura sira ne’e foin simu pose iha loron 30 fulan-Janeiru 2026, no foin hala’o mandatu durante fulan haat nia laran. Tanba ne’e ami iha obrigasaun ida atu mai aprezenta ami-nia an rasik ba Xefe Governu,” Universidade Nacional Timor Lorosa’e, Juviano António da Costa, informa ba jornalista sira iha Palásiu Governu, ohin.
Aleinde ne’e, nai dehan, iha sorumutu ne’e nia hakarak hato’o kumprimenta institusionál no mós saudasaun akadémiku ba Primeiru-Ministru, tanba daudaun ne’e sira mak nu’udar jerente iha UNTL.
“Aleinde ida-ne’e ami mós atualiza kona-ba ami-nia planu no programa ba dezenvolvimentu UNTL no relatóriu adisionál balun liga ho orsamentu Estadu ne’ebé durante ne’e sira ezekuta inklui orsamentu ba tinan oin nian,” nia dehan.
Enkuantu planu no programa ne’ebé sira prepara mak liga liu ba melloramentu kondisaun bázika UNTL no dezenvolvimentu infraestrutura ba futuru mai, entaun ohin sira mai aprezenta atu Xefe Governu bele konsidera planu hirak ne’ebé sira prepara.
“Durante iha ami-nia mandatu planu ne’ebé sai prioridade mak melloramentu no jestaun internál UNTL, mellora prosesu akadémiku iha UNTL, mellora rekursu umanu liuliu dosente sira-ne’ebé atu forma estudante universitária hodi hasa’e ami-nia kualifikasaun iha ASEAN, no ikus liu mak mellora infraestrutura UNTL,” nia informa.
Nune’e iha enkontru ne’e sira mós husu apoiu ba Governu atu konstrui edifísiu foun ida ba Reitór no Reitória UNTL iha Hera ba tinan oin mai.
“Kestaun infraestrutura sai urjentemente ba ami atu garante fatin reitória foun ho dignu. Nune’e ami aprezenta ona, hein desizaun husi Governu, tanba agora OJE 2026 la’o hela tuir andamentu ne’ebé iha, maibé Xefe Governu mós konkorda ho ami-nia planu ida ne’e,” nia dehan.
Jornalista : Alexandra da Costa
Editór : Cancio Ximenes
