BOBONARO, 27 fevereiru 2023 (TATOLI) – Ministru Agrikultura no Peska (MAP), Pedro dos Reis, hateten daudaun ne’e instala ona mákina ne’ebé prodús ai-haan ba animál iha postu administrativu Maubara, munisípiu Liquiçá.
Nia subliña, establesimentu fatin produsaun ai-haan ba animál nian ne’e bazea ba orientasaun hosi Primeiru Ministru, Taur Matan Ruak, hafoin lansa kolleta ikan Nila-Tilapia iha suku Leo-Hitu, postu administrativu Balibo, tanba haree katak maioria agrikultór sira sosa ai-haan sira-ne’e importa hosi rai-li’ur.
Notísia relevante: Empreza Keshavarz inisia investimentu produsaun fábrika alimentasaun animál iha Maubara
“Ha’u atu partilla informasaun de’it katak, agora daudaun ita instala ona mákina ne’ebé mak Ministériu Agrikultura sosa, ita instala ona iha Maubara, ne’ebé mak ba futuru sei prodús hahán ikan, hahán manu no hahan fahi iha ita-nia rai laran,” nia informa asuntu ne’e iha ámbitu inaugurasaun armazein CLN iha Maliana, segunda ne’e.
Nia dehan, formulasaun ba ai-haan animál nia ne’ebé presiza mak hanesan batar, fore-keli, fore-mungu, naan-raan no sei mistura ho lantoro-tahan ne’e.
Nune’e nia dehan, iha tempu badak sei halo lansamentu ba mákina ne’e, maibé sei Governu sei dúvida ba kuantidade produsaun.
“Fatin ida-ne’e kada loron, ita presiza loron ida prodús batar tonelada ida, ne’e ita foin sura batar de’it, seidauk seluk, entaun imajina took se loron ida ita prodús tonelada ida, dalaruma ita-nia lamentasaun sira dehan, ita kuda mais merkadu laiha ne’e, lae ita mak keta prodús la to’o karik,” governante ne’e hateten.
Nia hatutan, bainhira mákina ne’e funsiona signifika katak osan sira ne’ebé sei sirkula de’it iha rai laran hodi fó subsídiu ba komunidade, veteranu no seluk tán.
Notísia relevante: MAP Kontinua Tau Prioridade Ba Produsaun Ai-han Prinsipál
Jornálista: Sérgio da Cruz
Editór:Evaristo Soares Martins
