BAUCAU, 27 fevereiru 2023 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Baucau husu ba veteranu hotu hosi nível aldeia to’o postu administrativu iha munisípiu Baucau atu hasa’e bandeira durante loron-haat hodi selebrasaun loron nasionál veteranu.
Sekretáriu Jerál CMCLN Baucau, Manuel ‘Alari’ da Costa Soares, esplika, hasa’e bandeira nasionál durante loron-haat, hahú hosi loron 01 to’o 4 fulan-marsu nu’udar onra no glória ba eroi pátria ne’ebé mate iha luta ba ukun rasik-aan.
“Ne’e loron boot tanba veteranu sira hahú halo mudansa oinsá lori luta ba prosesu ukun rasik, tanba ne’e mai hotu-hotu dignifika iha loron inportante ne’e,” Sekretáriu Jerál CMCLN Baucau informa Agência TATOLI iha Vila Antiga, segunda ne’e.
Alari argumenta, konsellu veteranu harii atu sai mahon ba antigu kombatente hotu tanba ne’e selebrasaun loron nasionál veteranu ba tinan-2023 ne’e sai momentu importante ba veteranu hotu liuliu munisípu Baucau atu hahú hamriik sai kontributór ba dezenvolvimentu nasionál.
Tinan-ne’e, munisípiu Baucau sei reprezenta veteranu hamutuk na’in-20 partisipa iha selebrasaun loron nasionál veteranu iha Dili komposta hosi estrutura nível munisipál na’in-lima no na’in-15 seluk hosi postu administrativu neen iha munisípiu Baucau.
Reprezentante na’in-20 refere sei tuir atividade durante loron-haat iha nasionál tuir sekuénsia programa hanesan loron dahuluk sei realiza misa requem iha Jardim dos Herois Metinaro, semináriu ho tema Hametin Unidade ba Dezenvolvimentu Nasionál no loron ikus taka ho serimónia hasa’e bandeira.
Alari mós husu ba oan hosi veteranu sira-ne’ebé idade sei joven hotu atu labele lakon tenpu ba atividade ne’ebé laiha benefísiu maibé hahú projeita ba futuru hanesan prepara-aan estuda tanba dezenvolvimentu nasaun la’ós de’it presiza ema barani maibé mós tenke matenek.
Jornalista : Natalino Belo
Editór : Evaristo Soares Martins
