DILI, 08 marsu 2023 (TATOLI) –Vise Ministru Justisa José Edmundo Caetano, hateten Ministériu Justisa (MJ) hamutuk ho Kompañia Thales hahú deskute presu produsaun ba kaderneta pasaporte.
“Parte kompañia Thales no Visi Mitra hasoru malu ona Ministru Justisa iha semana kotuk hodi koalia kona-ba presu kaderneta pasaporte.Tanba ita hatene presu kaderneta pasaporte ida, iha nivél mudiál ho presu másimu $10. Maibé presu kaderneta pasaporte ne’ebé kompañia fó ba Timor-Leste, kaderneta pasaporte ida ho presu másimu $13:50 (Treze dolar e cinquenta centavos), tanba ne’e Governu hamutuk ho kompañia sei haree didi’ak presu ne’e”, José Edmundo Caetano dehan ba jornalista sira iha Palásiu Governu, kuarta ne’e.
Tuir nia, Governu prevé ona orsamentu ba produsaun kaderneta pasaporte, maibé tanba de’it razaun presu ne’ebé kompañia aprezenta ba Governu ne’e konsidera bo’ot entaun presiza halo diskusaun fila fali antes hetan konkordánsia ba produsaun.
“Espera Ministériu Justisa hamutuk ho kompañia bele iha solusaun ba ida ne’e, atu nune’e semana oin ita-nia aprovizionamentu Ministériu Justisa bele prosesa ona hodi ita hahú halo ona produsaun ba kaderneta pasaporte”, nia dehan.
“Kompañia ne’ebé mak agora dadaun atu halo produsaun ba kaderneta pasaporte, sira ne’e mak uluk halo produsaun no kompañia ne’e rasik hetan rekomendasaun hosi International Civil Avetion Organization (ICAO), hodi prodúz pasaporte ba ita”, Governante ne’e informa.
Tanba ne’e, Governu laiha dalan seluk atu troka kompañia ne’e no sei avansa ho ida ne’e.
“Ita laiha dalan atu troka kompañia ne’e, maibé espera katak parte Governu no kompañia bele solusiona tiha kestaun ne’e” nia konkui.
Notísia relevante : MJ kontrata empreza halo produsaun kaderneta passaporte
Jornalista: Natalino Costa
Editór : Zezito Silva
