DILI, 23 marsu (TATOLI)-Sekratáriu Estadu Formasaun Profisionál no Empregu (SEFOPE) liuhosi Diresaun Nasional Empregu Exterior (DNEE), konsege simu aplikante 55.436 hosi rezultadu rekrutamentu foun traballadór ba servisu iha Austrália.
Rekrutamentu foun ba traballadór Austrália ne’e prosesu liuhosi online ne’ebé hala’o iha loron 06 marsu 2023 no ramata iha loron 17 marsu 2023 ho objetivu fó oportunidade ba timor-oan bele partisipa hodi ba servisu iha Austrália.
“SEFOPE liuhosi DNEE hakarak fó hatene ba públiku katak aplikasaun online ba PALM semi-skilled nian ne’ebé hala’o iha loron 06 marsu ramata ona iha loron,17 marsu 2023. Ne’ebé aplikasaun ne’ebe ami simu hamutuk 55.436 kompostu hosi mane 34.425 no feto 21.011,” hakerek nota komunikadu ne’ebé Agência TATOLI asesu, kinta ne’e.
Notisia relevante : Fulan ne’e, SEFOPE halo fali rekrutamentu foun ba kandidatu traballadór servisu iha Austrália
Rezultadu hosi aplikasaun ne’ebe SEFOPE simu ona ekipa DNEE sei hahú hala’o pre-screening ka pre- avaliasaun hosi loron segunda 27 marsu 2023, no ekipa sei avalia tuir kritéria ne’ebé iha no sei fó sai rezultadu depende ba prosesu pre- avaliasaun bainhira ramata.
“DNEE mós apela ba públiku liuliu aplikante sira atu labele fiar ema ruma ne’ebé lori funsionariu SEFOPE/DNEE nia-naran hodi halo kobransa ilegal atu fasilita ita bo’ot sira nia susesu iha ami-nia prosesu avaliasaun ne’e. Imi bele hato’o lalais keixa mai mai ami, liuhosi númeru kontaktu no email ne’ebé ami tau ona iha iha ami-nia pájina,” hakerek komunikadu ne’e.
Jornalista : Arminda Fonseca
Editora : Armandina Moniz
