iklan

EKONOMIA, HEADLINE

Fulan ne’e, SEFOPE halo fali rekrutamentu foun ba kandidatu traballadór servisu iha Austrália

Fulan ne’e, SEFOPE halo fali rekrutamentu foun ba kandidatu traballadór servisu iha Austrália

Diretór Jerál SEFOPE, Paulo Alves. Imajen Tatoli/Francisco Sony

DILI, 01 marsu 2023 (TATOLI)— Sekretária Estadu Formasaun Profesionál no Empregu (SEFOPE), liuhosi Diresaun Nasional Empregu Exteriór (DNEE), fulan ne’e, sei halo filafali rekrutamentu foun ba kandidatu traballadór hamutuk 41.000 ne’ebé aplika ona iha tinan 2022, tanba konsidera la prienxe kritériu.

Diretór Jerál Sekretária Estadu Formasaun Profesionál no Empregu, Paulo Alves, hateten, objetivu SEFOPE hakarak halo fali prosesu selesaun foun ba kandidatu sira ne’e hotu. Tanba, ho razaun hakarak fó fali oportunidade timor-oan hotu bele partisipa hodi hetan oportunidade ba servisu iha Austrália.

“Husu ba joven timor-oan ne’ebé halo ona aplikasaun ba vaga Austrália nian iha tinan kotuk, ami hakarak halo fali prosesu selesaun foun ba kandidatu sira ho razaun hakarak fó fali oportunidade ba timor-oan hotu bele partisipa. Tanba, tuir prosesu selesaun ne’ebé ita halo ba aplikante 41.000 ne’e kuaze iha 14.000 mak sistema la akapta no sistema akapta de’it aplikante 10.000, maibé ikus mai ekipa avalisaun halo ba kandidatu 200  mak bele tama ona iha kritériu,” Paulo alves hateten,  liuhosi konferénsia imprensa ne’ebé hala’o iha Edifísiu SEFOPE Caicoli, Dili, kuarta ne’e.

Nia dehan, maske SEFOPE temi aplikante 41.000 ne’e maibé oportunidade ne’ebé SEFOPE loke fali iha fulan ne’e ba timor-oan hotu ne’ebé iha vontande hakarak ba servisu iha Austrália bele halo aplikasaun hotu ho maneira nafatin liuhosi online. Aplikante iha fulan dezembru 2022 ne’ebé naran iha ona sistema tuir ona formasaun no labele aplika fali.

“Maibé buat ne’ebé ita husu joven sira bainhira aplika fali tenke haree didi’ak mak priense. Tanba, agora ita loke foun fali ne’e, aplikante sira antes priense formuláriu la tuir nia regra, perguntas barak iha formuláriu la priense hotu, ne’ebé husu ba imi oportunidade foun ne’e, tenke haree didi’ak tanba ida ne’e sistema online,” nia dehan.

Nia dehan, SEFOPE iha  esforsu tebes hakarak halo fali rekrutamentu foun ba kandidatu traballadór Austrália tanba iha tinan 2022 Timor-Leste konsege haruka ona traballdór hamutuk 3.514. No iha tinan 2023 tarjetu ne’ebé SEFOPE hakarak atinje ne’e to’o 8.000. Ho ida ne’e,  ba númeru kandidatu ne’ebé   mínimu tebes SEFOPE fó fali oportunidade ba timor-oan hotu halo fali prosesu aplikasaun ne’e.

Nia dehan, prosesu rekrutamentu ne’e iha diferensa oituan ho sira ne’ebé uluk naran iha ona sistema ba baze dadus, liuliu sira ne’ebé rekrutadu tiha ona ba sistema Seasonal Workers Program.

“Prosesu ida ne’e la hanesan ona tanba iha tinan 2021 Governu Austrália introdús programa foun ho naran Pacific Australia Labour Mobility (PALM) Scheme ne’ebé kombina ho programa SWP no PLS.

Nia dehan, vantajen sira hosi prosesu aplikasaun foun agora ne’e, mak komisaun sei prepara kritériu ho di’ak hanesan, fó oportunidade foun no hanesan ba aplikante hotu ne’ebe aplika iha fulan dezembru 2022 atu submete aplikasaun ho dia’k no ho korretu.

Nune’e, iha aplikasuan online sei hetan “text message” ne’ebé sei fó esplikasaun klaru no tulun óinsa atu priense aplikasaun online. Hosi pasu ida ba pasu seluk, atu aplikante sira bele kompleta informasaun hotu ho didi’ak no la husik ema ida ba kotuk, tanba hetan difikuldade priense aplikasaun no submete aplikasaun mamuk ka inkompletu.

Ekipa sei asegura sistema hotu funsiona ho di’ak no responde ba difikuldade ruma karik aplikante sira hasoru durante prosesu aplikasaun liuhosi email jerál ida ne’ebé ekipa avaliasuan sei monitoriza.

Prosesu aplikasaun vaga foun ba kandidatu traballadór ne’e, sei loke durante loron sanolu (10) nian-laran, hahú hosi loron 06 to’o 17 marsu 2023.

“Ita-nia ekipa avaliasaun hosi SEFOPE ho apoiu hosi programa Austrália nian sei responsável halo avaliasaun ba aplikasaun sira hosi prosesu foun ida ne’e tuir kritéiru ne’ebé prosesu estabelese ona, no rezultadu avaliasaun aplikasaun finál sei anunsia ba públiku iha loron 10 abril 2023,” nia hateten. 

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!