DILI, 29 marsu 2023 (TATOLI)—Komisáriu Ezekutivu Servisu Tékniku no Vogál Konsellu Administrasaun, Eletrisidade de Timor-Leste, Empreza Públika (EDTL,E.P), Latino Jerónimo, hateten problema instabilidade rede internet lentu rezulta mos sistema 3E (Eclipse Entreprise Edition) ba pulsa elétrika mos lentu ka todan.
“Ha’u hakarak informa ba públiku daudaun ne’e, iha postu venda sira, bainhira kliente sira atu sosa pulsa elétrika lentu tanba, instabilidade rede internet rezulta mos ba sistema 3E halo mos lentu bainhira sosa pulsa elétrika,” Latino Jerónimo, hateten iha nia-knaar fatin, EDTL,E.P Caicoli, Dili, kuarta ne’e.
Nia dehan, sistema ne’ebé daudaun EDTL,E.P uza faan pulsa elétrika ne’e, uza itron ne’ebé mak responsável ka uza tinan 10 eziste ona iha Timor-Leste.
“Entaun sistema ne’e presiza halo melloramentu upgrade ba ami-nia sistema ho server. Ita hotu hatene bainhira sosa pulsa lentu ne’e, tanba kliente aumenta no postu venda ba munisípiu sira mós aumenta. Ho ida ne’e, sistema itron tuan ona bainhira ema barak hola pulsa dala-ida iha tempu hanesan tenke hamosu lentu, tanba sentru venda rasik agora iha 481 iha territóriu laran,” Latino hateten.
Nia dehan, faillansu ba sosa pulsa elétrika lentu kauza seluk mak speed internet ne’ebé operadór telekomunikasaun Telkomsel oferese ne’e menús no tanba mós itron rasik todan no presiza halo melloramentu.
“Speed internet ne’ebé antes ne’e, Telkomsel oferese hamutuk speed 6MB maibé agora ita upgrade ona bá 10MB. No sistema itron ne’ebé ita uza iha tinan kotuk, avizu atu halo melloramentu ba sistema ne’e. Maibé ita seidauk imediatamente natón halo tanba ita iha mós projetu ida ne’ebé daudaun halo hela konkursu públiku iha Komisaun Nasional Aprovizionamentu kona-ba kontadór no instalasaun ba sistema ne’ebe agora eziste,” nia hateten.
Nia dehan, aprovizionamentu ne’e, iha ona rezultadu ka seidauk mós EDTL,E.P mós sei halo esforsu kontaktu responsável direita ba sasán itron iha Jakarta-Indonézia no sira apoiu hela remote assistant hosi Jakarta hodi halo melloramentu ba sistema itron ne’e.
Nia dehan, solusaun ne’ebé EDTL,E.P daudaun halo mak iha alokasaun serve rua iha Telkomsel no ko’alia tiha ona ho sira atu fornese ba ajénsia sira ne’ebé faan pulsa ho Virtual Private Network (VPN). Ida ne’e objetivu atu asesu ba de’it ba kliente sira ne’ebé mak atu halo tranzasaun ba pulsa elétrika. Tanba VPN ne’e, bainhira atu uza internet ba interese seluk sistema sei la simu.
“Ita komunika tiha ona ho Telkomsel no sira fornese ona sira-nia sim card ba ita atu komunika ba ajénsia venda sira hola hodi tau iha sira-nia fatin. Nomos uza pulsa internet fulan ida $30 ho sim card ne’e ba VPN nian. Ita presiza 4G maibé sira fó 3G. Ho ida ne’e, ita komunika hela ho sira atu hetan fali 4G, pada fasilita ita-nia ajénsia venda sira hodi aselera ba faan pulsa nian ho lais,” nia hateten.
Nia dehan, iha tempu badak ne’e, Telkomsel seidauk bele fasilita, no EDTL,E.P sei halo atualizasaun ba sira-nia server rua ne’ebé mak iha. Tanba, server ne’e ida normalmente online no seluk stand by. Ekipa tékniku sira agora esforsu hela atu ohin loron bele halo melloramentu balu hodi ajénsia sira ne’ebé faan pulsa bele aselera fali servisu normál.
“Iha Dili, ajénsia sira ne’ebé faan pulsa iha haat hanesan ne’e, ita koko ona sira balu sosa ona modem sim card foun no ohin dadersaan ne’e hahú la’o ona,” nia hateten.
Nia hateten, sosa pulsa elétrika lentu ida ne’e, la’os de’it públiku nia preokupasaun maibé mós ba EDTL,E.P. Tanba situasaun ne’e mak kontinua akontese nia impaktu mak bele hamosu ema dada ahi ilegál no EDTL,E.P menús rekolla reseita ba kofre Estadu.
“Maibé ita halo ona esforsu espera iha tempu badak buat hotu sei la’o di’ak,” nia dehan.
Jornalista : Arminda Fonseca
Editora : Armandina Moniz
