COVALIMA, 19 abríl 2023 (TATOLI)–Reprezentante Administradór munisípiu Covalima, Francisco Mendonça, husu ba partidu polítiku sira konsensializa militante sira, nune’e bele kria pás no trankuilidade durante iha eleisaun parlamentár 2023.
“Xefe suku komunika ita-nia komunidade no partidu polítika tenke konsensializa ita-nia militante sira. Tanba, partidu polítika organiza nia militante hosi aldeia, nune’e militante iha ambisaun maske iha mídia ko’alia liafuan saida de’it, hafoin eleisaun ita di’ak bainhira partidu balun manán hodi ba ukun hanesan laiha diferensa. Diferénsia iha programa dezenvolvimentu bem estar povu nian,” Reprezentante Administradór Munisípiu Covalima, Francisco Mendonça, hato’o liuhosi nia diskursu bainhira hala’o abertura enkontru koordenasaun ho autoridade lokál ba eleisaun pasífiku iha salaun STAE Covalima, kuarta ne’e.
Enkontru koordenasaun ho autolidade lokál sira ba eleisaun pasífika tinan 2023 ne’e, organiza hosi Komisaun Nasionál Eleisaun (CNE, sigla portugés) hodi prepara ba eleisaun parlamentár tinan 2023.
“Eleisaun pasífika hakarak dehan nune’e, eleisaun pasífika signifika eleisaun mai antes. Ita hakarak mantein nafatin kalma pasífiku mai hosi lianfuan pás, mantein pás no trankuilidade, aujénsia, perturbasaun no ajitasaun durante iha eleisaun parlamentár. Ho nune’e, iha períodu kampaña ema hotu tenke iha konxiénsia kria pás no estabilidade, trankuilidade, aujensia, perturbasaun no azitasaun katak labele kria konflitu no labele halo provokasaun,” nia dehan.
Atu kria pás no trankulidade durante iha eleisaun parlamentar la’ós iha seguransa liman de’it, maibé atu kria pás no trankuilidade iha sidadaun hotu nia liman, ho nune’e foin lalais realiza ona palku dame ho Grupu Arte Marsiál (GAM) iha postu administrarivu Zumalai.
Komisáriu CNE destakadu Aileu-Covalima, Carlito Martins, hateten CNE organiza enkontru koordenasaun ho autoridade lokál ba eleisaun pasífika tinan 2023, ho intensaun atu halo koordenasaun realiza eleisaun pasífiku ho ambiénte kria pás no dame iha eleisaun parlamentár.
“Ita-nia objetivu prinsipál ita-nia enkontru ohin reprezenta administradór ko’alia ita atu halo koordenasaun realiza eleisaun pasifíku, katak ita hala’o eleisaun iha ambiente pás no dame, ita bolu eleisaun pasifíka,” nia hateten.
CNE organiza enkontru refere atu halo koordenasaun metin hodi realiza eleisaun pasífika halo koordenasaun ida-ne’e hanesan paktu unidade nasionál hodi envolve parpol politika hotu no entidade ne’ebé hala’o iha nivél munisípiu to’o iha nasionál.
Nune’e, nia dehan, realiza eleisaun iha ambiénta pás no trankuilidade atu fó hanoin hodi enkoraja malu, realiza eleisaun hotu-hotu simu responsabilidade hodi garante pás, estabilidade peranta iha eleisaun parlamentár.
Entertantu, iha loron 13 fulan-marsu tinan 2023 ne’e, Prezidente Repúblika José Ramos Horta dekreta loron eleisaun ne’ebé sei akontese iha loron 21 fulan-maiu tinan 2023.
Tuir kalendáriu partidu polítiku sira hahú kampaña eleitorál iha loron 19 fulan-abríl ohin hahú hala’o kampaña eleitorál to’o loron 18 fulan-maiu tinan 2023.
Jornalista : Celestina Teles
Editór : Cancio Ximenes
