MANUFAHI, 28 abríl 2023 (TATOLI) – Prezidente Partidu Libertasaun Popular (PLP), Taur Matan Ruak, iha nia intervensaun ba kampaña ho tipu komísiu ne’ebé hala’o iha kampu futeból Same afirma PLP fó importansia ba diversifikasaun ekonomia iha setór tolu.
“Diversifikasaun ekonomia iha setór tolu, agrikultura, peska no turizmu ne’ebé presiza investe makas liután bainhira nafatin kaer Governu, tanba iha kampaña fatin barak promote ona atu hasai billaun ida ho tempu tinan lima ba fundu ida hodi dezenvolve agrikultura”, Taur dehan iha komísiu polítiku, sesta ne’e.
Nia dehan, tuir observasaun durante kaer ukun haree katak populasaun sira servisu iha agrikultura konsege prodúz foos rihun-86 tonelada.
“Ida ne’e mak ami haree no hanoin katak ita-boot sira labele prodúz fos naton ba ita han, entaun tinan kotuk Governu tau millaun $50 fó kréditu ba emprezáriu sira ne’ebé hakarak halo toos no natar, maibé sira tauk, entaun saida mak ami hanoin Governu tenke servisu direta ho agrikultór sira, liuhosi movimentu sira, assosiasaun sira, kooperativa sira, estadu nia empreza ba hahan hodi servisu ho populasaun sira”, Taur dehan.
Servisu hotu ne’ebé durante Governu halo bazeia de’it ba moto PLP nian fahe rikusoin hanesan oportunidade hanesan, hisik kosar ba moris di’ak.
“Agora ita tama ona iha faze fahe rikusoin hanesan, ida ne’e mak Governu kanaliza osan barak ba suku sira no postu atu evita ita-boot sira ba Dili atu hetan osan maibé iha ita-boot sira nia fatin mós bele hetan osan, tuir mai mak ita tenke hisik kosar tanba moris di’ak labele monu hosi lalehan maibé tenke hisik kosar”, nia relata.
Ho nune’e, mak programa Governu ne’ebé lidera hosi PLP tau importánsia liu ba povu sira iha suku no aldeia tanba Governu mesak sei labele lori Timor-Leste ne’e ba oin maibé hamutuk ho povu mak foin bele lori ba oin.
Nia hatutan, iha setór peska no turizmu bainhira mantein kaer Governu mak sei dezenvolve makas liután hodi hatama reseita ba Estadu.
Kampaña ne’e hala’o hetan supervizaun direta hosi Komisaun Nasionál Eleisaun (CNE-sigla portugés), monitoriza hosi Provedoria Diretu Humanu no Justisa (PDHJ) no seguransa másimu hosi Polisia Nasionál Timor-Leste (PNTL) Munisípiu Manufahi.
Tuir oráriu ne’ebé aprova hosi CNE nasionál kampaña ba PLP aban sei kontinua halo iha Munisípiu Covalima no Ainaro.
Jornalista: Hortencio Sanchez
Editór : Zezito Silva
