DILI, 02 maiu 2023 (TATOLI)—Administrasaun Eletricidade de Timor-Leste, Empreza Públika (EDTL, E.P) husu ba kliente hirak ne’ebé pulsa elétrika sei iha, la presiza hadau malu sosa pulsa atu hetan bonus iha loron 01 kada fulan tanba kondisaun ne’e sei halo sistema lentu.
EDTL, E.P fó sai informasaun ne’e relasiona ho kliente barak mak sosa pulsa eletrisidade iha loron dahuluk kada fulan.
“Hakarak informa ba kliente sira ne’ebé pulsa eletrisidade sei iha la presiza hotu-hotu hola pulsa iha loron 01 kada fulan, tanba bonus ne’ebé EDTL, E.P oferese sei la lakon, sei hetan iha primeiru kompra iha kada fulan. Atu sosa fali iha loron 03, 10, 15, 25 ka loron seluk ita sei nafatin hetan bonus, nune’e husik sira ne’ebé sosa, ba hirak ne’ebé pulsa hotu duni atu ajuda labele hatodan sistema,” refere nota ne’ebé Agência Tatoli asesu, tersa ne’e.
Notísia relevante : EDTL,E.P : Sistema sosa pulsa elétrika lentu tanba instabilidade rede internet
Nota hosi EDTL, E.P esplika, daudaun ne’e sistema venda enerjia liu ona tinan 10 no sentru venda estabelese ona iha fatin 400 resin, tanba ne’e halo sistema todan.
Aleinde ne’e, razaun sistema sosa pulsa eletrisidade todan hafoin EDTL, E.P halo esrforsu servisu hamutuk Ajénsia Teknolójia Informasaun no Komunikasaun, Institutu Públiku (TIC Timor, I.P) deteta katak iha ema tenta tama iha sistema ka hack hodi halo sistema opera la normál.
“Solusaun ne’ebé EDTL, E.P halo mak hetan apoiu tékniku hosi Banku Aziátiku Dezenvolvimentu (ADB, sigla inglés) no itron hanesan sistema na’in hodi halo manutensaun. Espera sei ajuda bele normaliza fali,” EDTL, E.P fó sai.
Empreza estatál ne’e deside uza Virtual Private Network (VPN) hodi taka ba públiku no labele ataka hosi hacker sira. Tanba ne’e limita sentru venda hodi asegura nafatin fa’an pulsa.
Parte seluk Komisaun Nasionál Aprovizionamentu (CNA, sigla portugés) konklui ona prosesu konkursu no hetan ona manan na’in hodi atualiza sistema ne’e rasik, enkuantu ekipa sei halo post kualifikasaun no sei asina kontratu hafoin atualiza.
Jornalista : Arminda Fonseca
Editora : Julia Chatarina
