MALIANA, 05 maiu 2023 (TATOLI)-Prezidente Partidu Libertasaun Populár (PLP), Taur Matan Ruak, promete bainhira Povu fó konfiansa no envolve iha governu, sei kontinua apoia no defende polítika atu dezenvolve fronteira Batugade, postu administrativu Balibo, munisípiu Bobonaro, sai interpostu komersiál ho nasaun viziñu Indonézia.
Tuar Matan Ruak, hato’o kompromisu polítiku ne’e iha kampaña aberta, ne’ebé hala’o iha kampu futeból Maliana Vila, munisípiu Bobonaro, sesta ne’e.
Notísia relevante: PLP sei lori prioridade tolu ba povu nia moris
“Batugade aban bainrua sei sai interpostu komersiál ho Indonézia, ita loke sidadade hanesan Oe-Cuse ne’e tolu Batugade, Baucau no Same,” nia hateten.
PLP hakarak defende polítika atu dezenvolve pontu entrada refere tanba planu ba futuru sidade munisípiu Bobonaro sei muda ba Batugade no Maliana husik hela sai fatin ba natar.
“Foin daudaun ha’u ba Indonézia asina akordu ho Jokowi, sei dezenvolve fábrika iha ita- nia, ita mak sei tau osan boot liu sira natoon, se halo iha sira-nia, sira mak tau osan barak liu sira natoon, mais sira uza mós ita-nia. Ita mós uza sira-nia, atu transforma perbatasan ne’e sai fatin ida-ne’e família nian, tanba ita satu pulau, dua negara,” Matan Ruak dehan.
Liga ho planu hirak-ne’e PLP mós iha programa prioridade ida atu fó kréditu ba universidade privada sira atubele loke kampus Ramon iha munisípiu tolu hanesan Baucau, Manufahi no Bobonaro, espesialmente iha Batugade tanba planu ba futuru sei halo rekualifikasaun ka hafoun sidade Dili ne’ebé daudaun ne’e dezorganizadu.
Nia dehan, rekualifikasaun sidade Dili ne’e, sei muda, portu Dili sei muda ba Tibar, Parlamentu Nasionál no Palásiu Governu sei muda ba Metinaro, Universidade Nasionál Timor Lorosa’e (UNTL) muda hotu ba Aileu
“Univsersidade privada ne’ebé hakarak ba Same, Baucau mai Batugade, governu fó kréditu funan laiha, atu sira mai halo eskola iha-ne’e, halo sala aula, halo uma ba profesór sira, alunu sira agora hela kos iha Dili, fatin laiha atu sira estuda, entaun halo uma ba sira, atu sira konsentra sira-nia tempu ba edukasaun,” nia dehan.
Kampaña ne’e superviziona hosi ofisiál supervizaun eleisaun hosi Komisaun Nasionál Eleisaun (CNE, sigla portugés), observadór nasionál, Provedoria Direitu Humanu no justisa (PDHJ).
Hetan seguransa hosi Polísia Nasionál Timor-Leste (PNTL), komandu munisípiu Bobonaro, Batallaun Orden Públika (BOP) no F-ALINTIL-Forsa Defeza Timor-Leste.
Notísia relevante: PLP sei fó kreditu ba estudante hodi kontinua ensinu superiór
Jornalista: Sérgio da Cruz
Editór: Evaristo Soares Martins
