AILEU, 07 maiu 2023 (TATOLI) – Família hamutuk ho entidade sira iha Munisípiu Aileu haloot Alvaro Castro Jesus ‘Namkari’ nia isin mate iha Jardim Herois Pátria Aileu.
Saudozu Namkari nudar mate restu 12 novembru 1991 ne’ebé dedika nia-aan ba prosesu luta libertasaun nasionál iha tempu difisíl iha momentu ne’ebá.
Saudozu hetan moras estroke iha tinan 2019 no iha tinan tolu nia laran saudozu Namkari halo tratamentu ba nia moras maibé la konsege rekoopera hosi nia-moras.
Iha loron 5 fulan maiu foin dadaun ne’e, saudozu Namkari hakotu iis iha Hóspitál Nasionál Guidu Valadares Díli (HNGV).
Prezidente Repúblika José Ramos Horta, liuhosi dekretu Prezidensiál númeru 32/2023, deside hodi haloot saudozu Alvaro Castro Jesus ‘Namkari’ iha Jardim Herois Pátria Aileu nudar aktu valorizasaun Estadu Timor-Leste nian ba saudozu nian dedikasaun luta ba auto determinasaun Timor-Leste. Tanba haree ba saudozu mós nudar ema ne’ebé fó nia aan ba mate liuhosi asaun 12 novembru 1991.
Tuir Konstitusaun RDTL artigu 11, Estadu rekoñese no valoriza sirkulár povu maubere nian kontra dominasaun estranjeira no ba ema sira ne’ebé envolve iha prosesu luta libertasaun nasionál.
Tanba ne’e, Estadu Timor-Leste entrega ba Ministériu Asuntu Kombatente Libertasaun Nasionál (MAKLN), liuhosi Konsellu Kombatente Libertasaun Nasionál (CCLN, sigla portugés), atu haloot saudozu Namkari iha jardim Herois Pátria Aileu tanba haree ba saudozu nia dedikasaun ba prosesu luta libertasaun nasionál.
Prezidente Konsellu Antigu Kombatente Libertasaun Nasionál Munisípiu Aileu Zacarias da Silva ‘Maputo’ sente triste ho saudozu Alvaro Castro ‘Namkari nia mate tanba Namkari hanesan kombatente ida ne’ebé mak uluk iha nia vida joven hatudu nia aten brani hodi kontribui ba prosesu luta libertasaun nasionál 12 novembru 1991.
Nia dehan, liuhosi asaun joven 12 novembru 1991 kontra okupasaun Indonézia mak loke mundu nia matan katak timoroan nia luta ba prosesu auto determinasaun.
“Tanba ne’e, ha’u husu ba joven agora atu banati tuir joven sira uluk nia luta hodi kontribui ba pás no estabilidade hodi foku ba dezenvolvimentu povu no nasaun ne’e nian”, Zacarias da Silva ‘Maputo’ hateten, iha nia intervensaun baihira partisipa serimónia funebre Saudozu Namkari nian iha Jardim Heroi Pátria Aissirimou Aileu Vila, sábadu ne’e.
Iha fatin hanesan, reprezentante família saudozu Namkari, Apolinario Salsinha hateten, hanesan familía, sente triste tanba lakon membru família ne’ebé di’ak iha família sira nia leet.
Nia agradese ba Estadu liuhosi Konsellu Kombatente Libertasaun Nasionál, Munisípiu Aileu, hodi organiza saudozu Namkari nia funebre to’o halot iha nia deskansa fatin.
“Lori família nia naran no reprezenta família 12 novembru ha’u hakarak agradese ba Estadu liuhosi Ministru Asuntu Kombates Libertasaun no Konsellu Kombatente Libertasaun Nasionál hamutuk ho família ohin lori saudozu mai hatoba iha nia deskansa ikus iha ne’e”, nia afirma.
Biografia Alvaro Castro Jesus ‘Namkari’
Saudozu Alvaro Castro Jesus ‘Namkari’ moris iha Suku Liurai Badera-Hun, Postu Administrativu Aileu Vila, Munisípiu Aileu iha loron 22 fevereiru 1963 oan hosi aman Colibere ho Bicasa nia oan.
Hafoin moris família lori Saudozu Namkaria ba hela iha Díli iha Bebora hodi hela hamutuk família boot avo Paul Castro.
Kona-ba nivél estudu nian, Saudozu Alvaro Castro konsege finaliza nia estudu iha nivél sekundária São José Díli atu saudozu kontinua dedika nia aan ba prosesu luta libertasaun nasionál iha rede klandestina iha NUREP iha 20 de maiu Zona Dom Aleixo ho nian kordenadór mak Denis Maia hahú hosi tinan 1995- 1999.
Saudozu mós hanesan joventude Lorico Aswain 12 novembru 1991 .
Saudozu mós hanesan ema ne’ebé envolve aan iha grupu daruak ho ró hodi halai ba iha Austrália, maibé la konsege no ikus mai hetan kapturasaun hosi forsa indonézia.
Iha tinan tuir saudozu kontinua hal0 servisu rede kladestina nune’e hetan orientsaun hosi nia kordenadór komisaun ezekutivu nasionál Carlos Lemos ‘ Sakoko’.
Hafoin Timor-Leste hetan ninian independensia iha 2002 Saudozu Alvaro Castro Jesus deside ba tiha rai li’ur hodi buka nian moris iha inglatera no fila mai iha Timor-Leste 2019. Tanba saudozu nian kondisaun fiziku mak ladun di’ak tanba ne’e nia deside fila mai TL.
Haree ba kondisaun moras ne’e afeta kedan ba saudozu nian saude hodi rezulta moras struck hodi halo tratamentu iha tinan tolu nia laran no ikus mai saudozu hakotu iis iha Hospitál Nasionál Guidu Nasionál Valadares Dili.
Jornalista: Natalino Costa
Editór : Zezito Silva
