MANATUTO, 09 maiu 2023 (TATOLI)—Diretór Servisu Edukasaun Munisípiu Manatuto, Graciano de Jesus Baptista, hateten ba estudante mellór klasifikasaun 138 ne’ebé sai benefisiáriu ba programa bolsa méritu atu kompleta konta bankária, nune’e Servisu Edukasaun Manatuto bele prosesa lalais.
Notísia Relevante: Estudante mellór klasifikadu 755 iha Manatuto asesu bolsa méritu
“Ami munisípiu nia kna’ar mak ami informa ba sira, nune’e oinsá loke konta bankária. Husu atu labele konfunde katak Servisu Edukasaun Munisipál Manatuto mak trata konta bankária ne’e, lae maibé ida-ne’eestudante nia inan-aman sira mak tenke trata no ami fasilita de’it prosesu sira-ne’e. Husu nafatin ba ita hotu katak ida-ne’e la’ós ami-nia kompeténsia,” nia dehan ba Agência Tatoli, liuhusi telefónika, tersa ne’e.
Nia dehan, hosi benefisiáriu 755 ne’e, benefisáriu na’in-138 mak seidauk hatama konta bankária nune’e husu ba inan-aman sira atu bele trata lalais.
“Informa nafatin ba estudante nia inan-aman atu loke ona konta bankária. Ida-ne’e, ami informa de’it maibé la’ós ami-nia kompeténsia atu trata fali asuntu ne’e, lae. Ita hatene kritériu atu trata konta bankária ne’e difikulta inan-aman, tanba dala ruma iha inan-aman balun eleitorál laiha no iha billete identidade mós laiha. Depois, prosesu ida-ne’e gastu osan barak liu fali subsídiu ne’ebé atu simu, entaun hosi ne’e inan-aman sira komesa dezanima no ikus sira lakohi trata,” nia dehan.
Ho presusu ne’ebé kleur, nia koko ko’alia ho banku atu hafasil tiha ka hamenus kritériu maibé banku dehan ida-ne’e kritériu banku nian no sei la muda.
“Servisu Edukasaun Munisipál husu atu halo pagamentu direta maibé komu bolsa méritu ne’e mai ho nia pokote lei rasik no define iha ne’ebá, katak benefisiáriu bolsa méritu ne’e tenke selu liuhosi konta bankária no konta ne’e mós labarik ne’e nian rasik labele inan-aman ka ema seluk nian,” nia dhan.
Bolsa méritu ba nível nasionál ba ensinu báziku no ensinu sekundáriu jerál ho ensinu sekundáriu tékniku vokasionál ne’ebé ho nia kolokasaun orsamentu hosi nasionál hamutuk $36.000.
Ensinu báziku to’o ensinu sekundáriu tékniku vokasionál ba primeiru lugar mak sei hetan $5.000, segundu klasifikasaun hosi nível ensinu tolu nian mak $4.000, terseiru klasifikasaun ba nível ensinu tolu mak $3.000.
“Ba nível ensinu tolu ne’e hotu, kada nível ita iha $ 2.000, tanba iha klasifikasaun datoluk entaun totál orsamentu hamutuk $36.000,” nia hateten.
Notísia Relevante: Pagamentu bolsa méritu ba estudante 13.517 sei realiza marsu nia klaran
Jornalista : Osória Marques
Editór : Cancio Xiemenes
