MANATUTO, 12 maiu 2023 (TATOLI)—Administradór postu administrativu Soibada, munisípiu Manatuto, Luis Gonzaga da Silva, hateten orsamentu ba subsídiu fim do ano $200 ne’e postu administrativu Soibada devolve fali $12.600 ba Governu.
“Subsídiu fim do ano $200, ita halo pagamentu hotu kle’ur ona no mós fó fila osan ba Governu hamutuk $12.600. Osan hirak ne’e devolve ba Governu tanba lista benefisiáriu sai dupla no balun saláriu boot ne’ebé sira labele simu subsídiu $200 ne’e,” nia hateten ba Agência Tatoli liuhosi telefónika, sesta ne’e.
Hosi montante orsamentu ne’ebé fó fila, nia hateten, suku Manufahi $3.000, suku Samoro $1.000, suku Fatumakerek fó fila $2.000, Leohaat $3.600 no suku Manlala devolve osan hamutuk $3.000.
Nia dehan, hosi osan ne’e benefisiáriu hamutuk 63 mak la simu osan ho razaun naran sai dubru no iha rendimentu boot ka liu $500.
Aleinde ne’e, nia hateten, iha mós lista reklamante hamutuk 33 ne’ebé kompostu hosi suku Leohaat hamutuk 17 no suku Manlala hamutuk 16.
“Ita iha suku rua mak iha lista reklamante maibé suku tolu seluk laiha. Lista reklamante sira-ne’e ita subemte hotu ona ba nasionál hein de’it bainhira mak selu. Tanba ita sei iha ámbitu kampaña nune’e Governu foun mai mak sei atende,” nia hateten.
Iha Soibada, tuir nia, populasaun maioria mak simu ona sira-nia direitu subsídiu fim do ano $200 ne’e ho osan ne’ebé alokadu hamutuk $120.000.
Totál populasaun iha postu administrative Soibada hamutuk 4.000-resin no xefe família hamutuk 600 ne’ebé hela iha suku Manufahi, Fatumakerek, Leohaat, Samoro no Manlala.
Jornalista : Osória Marques
Editór : Cancio Ximenes
