MANATUTO, 12 maiu 2023 (TATOLI)—Sekretáriu Jerál Partidu FRETILIN, Mari Bin Amude Alcatiri, hateten iha loeon eleisaun 21 maiu 2023 mai, bainhira povu fó vitória ba FRETILIN mak sei tau prioridade hodi kria kondisaun ba manorin-sira nune’e bele eleva edukasaun ne’ebé kualidade iha Timor-Leste.
Notísia Relevante: Lidera fali Governu, FRETILIN promete hadia setór edukasaun
“Lori edukasaun ne’ebé kualidade ba povu iha rai ida-ne’e mak presiza kria kondisaun ba manorin-sira. Presiza ita hadi’a kondisaun ba ita-nia profesór sira. Tanba, bainhira profesór hanorin iha suku sira mak ita mós tenke kria kondisaun ba sira. Se profesór mak laiha uma, laiha kondisaun ida entaun ho buat sira-ne’e ita tenke muda,” Mari Bin Amude Alktiri hateten iha kampaña ho tipu komísiu ne’ebé realiza iha Manatuto, sesta ne’e.
Tanba, Mari Amude Alkatiri hateten, manorin-sira mak bele eduka no lori edukasaun ne’ebé kualidade ba futuru nian.
“Tanba ne’e, ha’u dehan hadi’a ne’e, hadi’a totál hosi leten mai to’o kraik. Maibé importante primeiru mak ita tenke halo jestaun edukasaun nian, dignifika Diretór eskola ho nia kolaboradór sira atu halo jestaun ba osan,” nia hateten.
Segundu, tuir nia, halo jestaun ba infraestrutura eskolár nian no terseiru mak halo jestaun ba alunu no profesór sira.
Alende ne’e, Sekretáriu Jerál FRETILIN hateten pesiza hadi’a funsionamentu profisionál saúde mak kria kondisaun sira hanesan fasilidade saúde.
“Kona-ba sentru saúde ema barak kestiona atu tau sentru saúde iha aldeia, maibé ne’e labele lai. Ita hakarak ne’e hakbesik profisionál saúde ba komunidade mak halo atendimentu movél,” nia dehan.
Tanba, nia hateten, dezenvolvimentu mak ba moris di’ak ema nian, nune’e presiza hadi’a sistema no setór sira depois edukasaun no saúde.
Eis Primeiru-Ministru ne’e hateten, Manatuto mós sai estaleiru oioin no Manatuto iha kondisaun hodi sai dezenvolvimentu nian tanba iha vantajen ekonomia ba Manatuto nia oan sira.
Jornalista : Osória Marques
Editór : Cancio Ximenes
