DILI, 17 maiu 2023 (TATOLI)—Governu no Banku Nasionál Ultramarinu (BNU) iha Timor-Leste, kuarta ne’e, selebra akordu servisu ida hodi atribui kartaun kréditu ba entidade Estadu sira.
“Asinatura ne’e atu ita adere ba kartau multi banku, kartaun kréditu hosi viza nian ho BNU, ne’ebé bainhira entidade Estadu halo viajen ba rai-li’ur ka atu halo pagamentu ruma la persiza lori osan tan iha saku laran maibé lori de’it mak kartaun ne’e hodi selu transporte no otél, ka selu ita-nia konta ruma ka lisensa uza ba aplikasaun ruma,” Ministru Finansa, Rui Augusto Gomes, hateten hafoin selebra asinatura ho BNU, iha Ministériu Finansa, tersa ne’e.
Notísia relevante : Governu Estabelese Kontratu Arrendamentu ho BNU
Tuir Ministru, dala-barak halo transferénsia osan karun liu fali do que uza kartaun, enkuantu kuandu uza osan cash dala-ruma bele lakon no valór bele monu.
“Ho kartaun ne’e bele fasilita Governu, pelu menus entidade Estadu 89 mak sai benefisiáriu dahuluk adere ba kartaun ne’e no sei espande tan tanba númeru ne’ebé sei uza to’o 109. Kartaun ne’e uza ba de’it viajen ofisiál estranjeiru hodi halo pagamentu tanba dala-barak ita bá iha fatin balun ita hasai ita-nia osan dolar ema la simu entaun tenke halai sai fali ba troka,” nia akresenta.
Governante ne’e dehan, bainhira entidade governamentál sira prienxe ona formuláriu ne’ebé prevee iha akordu, maka BNU sei emite kartaun ba kada entidade, nune’e utilizadór sira tenke uza kartaun ne’e bazeia ba regulamentu ne’ebé regula ona iha kontratu.
Razaun seluk utiliza kartaun kréditu ne’e maka sei aumenta transparánsia, ne’ebé kuandu halo tranzasaun eletrónika labele manipula valór osan bainhira atu halo pagamentu ruma.
“Validade kartaun ne’e durante tinan-tolu, kuandu hotu bele renova. Ida-ne’e diskute dala-barak ona, Kámara Konta mós chama atensaun ona no agora ita konkretiza, ne’ebé kartaun sira ne’e kuandu to’o mai bele utiliza ona, kartaun produsaun iha Portugal,” nia tenik.
Jornalista : Antónia Gusmão
Editora : Julia Chatarina
