DILI, 19 maiu 2023 (TATOLI)—Prezidente Komisaun Nasionál Eleisaun (CNE), José Agostinho Belo, hateten CNE ho autoridade seguransa observa hela atributu kampaña hosi partidu 17 ne’ebé taka besik sentru no estasaun votasaun sira iha territóriu nasionál ne’e tenke hasai.
Notísia Relevante: PR Horta: “Demokrasia labele husik ema ida iha kotuk”
“Ita observa mak bandeira balun ne’ebé dada no atributu balun taka besik sentru no estasaun votasaun sira, ita iha obrigatóriu tenke hasai no sei informa ba partidu polítika sira-ne’ebé taka ne’e. Tanba, ita hakarak votu ne’ebé rasionál, ba duni ho nia hanoin no hakarak hili tuir nia responsabilidade ida-ne’ebé durante ne’e partidu polítika fó programa liuhusi debate ne’ebé iha,” Prezidente CNE ne’e hateten ba jornalista sira hafoin partisipa iha semináriu Internasionál kona-ba fortalesimentu demokrásia pás, estabilidade iha konstrusaun Estadu Timor-Leste nian hamutuk ho parseiru Internasionál sira, iha Hotel Novo Turismo, sesta ne’e.
Nia hateten, kampaña eleitorál foin ramata nune’e hein eleisaun hotu no liu semana ida mak partidu polítika hotu-hotu tenke halo limpeza ba atributu partidu nian iha territóriu nasionál.
“Kona-ba atributu partidu polítika tuir lei katak depois de eleisaun semana ida, ita hamutuk ho partidu polítika sira hotu tenke hasai panfletu sira no surat tahan no bandeira iha dalan públiku, maibé agora seidauk tanba sei iha eleisaun maibé bainhira liu tiha semana ida mak la hasai ekipa CNE ho autoridade seguransa sei hasai,” nia hateten.
Nia dehan, CNE ho Polísia Nasionál Timor-Leste (PNTL) observa hela depois liu tiha eleisaun mak nafatin monta iha dalan públiku mak parte relevante sei limpeza maibé sei fó sansaun ba sira.
“Ita sei fó sansaun ba partidu polítika mak ko’a sira-nia osan partidu nian $4 ne’e, sira-ne’e iha medida ida nune’e partidu polítiku tenke hasai. Sira la hasai, entaun seguransa hasai no sira iha direitu,” nia hateten.
Dekreto do Governo Nú. 3/2022, 10 janeiru, hateten depois eleisaun hotu semana ida fó biban atu reprezentante kandidatu sira atu hamoos atributu kampaña durante loron-15, entaun iha períodu ne’e reprezenta la hamoos ka la hasai atributu iha espasu públiku maka CNE halo koordenasaun ho entidade relevante liu-liu seguransa sira.
Jornalista : Osória Marques
Editór : Cancio Ximenes
