NASIONÁL, POLÍTIKA

PR Horta: “Demokrasia labele husik ema ida iha kotuk”

PR Horta: “Demokrasia labele husik ema ida iha kotuk”

Prezidente Repúblika, José Ramos Horta. Imajen Tatoli/Francisco Sony

DILI, 19 maiu 2023 (TATOLI)—Prezidente Repúblika, José Ramos Horta, apresia ba demokrásia no konstrusaun Estadu iha Timor-Leste, tanba demokrásia la’ós de’it eleisaun maibé demokrásia mós labele husik ema ida iha kotuk inklui ema ho defisiénsia sira iha Timor-Leste.

“Ohin, ha’u hateten ba partisipante katak ami esperiénsia barak tanba iha osan uitoan hodi ajuda rai seluk hanesan Guiné Bissau, no ita ajuda halo eleisaun iha ne’ebá. Maibé demokrásia la’ós de’it eleisaun, demokrásia justisa, justisa tenke loos no dependente. Demokrásia mós labele husik ema ida iha kotuk, ne’e inklui ema ho defisiénsia sira no komunidade LGTBI, labele husik iha kotuk,” Xefe Estadu ne’e hateten ba jornalista sira, hafoin partisipa iha semináriu Internasionál kona-ba fortalesimentu demokrásia pás, estabilidade iha konstrusaun Estadu Timor-Leste nian hamutuk ho parseiru Internasionál sira, iha Hotel Novo Turismo, sesta ne’e.

Xefe Estadu hateten demokrásia mós labele halo diskriminsaun bazea ba relijiaun no etnia, tanba ne’e demokrásia ne’e haree ba povu nia moris, bainhira eleisaun tiha tinan lima mai mak povu nafatin ki’ak no la muda povu nia moris, entaun demokrásia sei lakon.

“Ida-ne’e ema sei la fiar no sei la partisipa, ida-ne’e esperiénsia akontese iha rai barak. Tanba ne’e ha’u espera katak ho eleisaun mai ne’e sei demokrátiku,” Xefe Estadu hateten.

Prezidente Komisaun Nasionál Eleisaun (CNE), José Agostinho da Costa Belo, hateten iha semináriu ohin ne’e atu fahe ideia ba malu kona-ba demokrásia nian.

“Ohin ne’e, tipu konferénsia imprensa ne’ebé ita-nia maluk hosi CPLP hamutuk ho CNE Timor-Leste hala’o. Sira-nia prezensa importante, nune’e bele fahe esperiénsia ba malu. Entaun ohin, ita ko’alia kona-ba pozisaun mak hetan númeru ne’ebé di’ak mak 10, ita iha CPLP ne’e di’ak maibé iha nível Ázia ita númeru um. Tanba ne’e mak, ohin, iha ne’e fó ideia ba malu no rona malu kona-ba demokrásia nian,” nia hateten.

Objetivu importante mak atu fahe esperiénsia liuliu kona-ba disputa eleitorál nian, la’ós disputa eleitorál nia rezultadu maibé prosesu tomak ne’ebé iha, hanesan kartaun sira-ne’ebé iha falsifikasaun.

“Iha ne’e mós ohin ko’alia atu oinsá órgaun eleitorál konduz eleisaun la’o ho di’ak. No oinsá sidadaun sira-nia fiar ba servisu órgaun eleitorál nian,” bia dehan.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!