VIQUEQUE, 24 maiu 2023 (TATOLI)—Polísia Nasionál Timor-Leste (PNTL) munisípiu Viqueque kaptura joven rua ne’ebé halo krime eleitorál iha aldeia Belula, suku Macadique, postu Uatulari, munisípiu Viqueque.
“Prosesu eleisaun iha sentru votasaun sira iha munisípiu Viqueque la’o di’ak, maibé bainhira ekipa la’o hosi postu Uatolari no Uatucarbau bá munisípiu tula materiál sensitivu eleisaun maizumenus tuku20:00 kalan, iha joven na’in-rua ho kondisaun lanu , tenta asalta ekipa nune’e iha momentu ne’ebá Polísia no Forsa halo kedas atuasaun no kaptura joven E no OP hodi tau kedan iha sela Eskuadra PNTL Uatolari,” Komandante PNTL Viqueque, Superentendente, Sebastião Alves Quintão, informa iha Kuartél Jerál PNTL Viqueque, kuarta ne’e.
Nune’e, PNTL halo prosesu ba joven rua iha loron 22 maiu 2023 no aprezenta kedan kazu ne’e ba Ministériu Públiku (MP) hodi kontinua halo prosesu judisiál.
“Akontesimentu ne’e konsidera krime tanba sira mai ho sasan kroat hanesan katana, ne’ebé ami foti hotu ona no tau iha Eskuadra Uatolari”, nia akresenta.
Notísia relevante : Eleisaun Parlamentár 2023 iha suku Macadique Viqueque la’o normál
Aleinde kazu ne’e, Polísia simu keixa hosi komunidade suku Macadique katak ema deskoñesidu oho komunidade nia fahi rua no husik hela iha luhan laran.
“Ami kontinua rejista akontesimentu ne’e no buka tuir maibé hosi kazu ne’e vítima sira deklara la identifika ema ruma. Entaun ida-ne’e maka difikulta ba prosesu. Ami nafatin ho vontande hala’o knaar,” nia dehan.
Hafoin eleisaun hotu membru seguransa no defeza kontinua halo seguransa másimu iha territóriu tomak, liu-liu postu Uatolari to’o formasaun Governu foun.
“Maibé bainhira ema balun laiha konsiénsia hodi hamosu krime, konserteza sira sei simu konsekuénsia tanba lei iha hodi projete ema no kondena ema. Ohin loron liuhosi rede sosiál hahú halo intimidasaun oin-oin iha postu Uatolari. Ami nafatin tau-atensaun ba informasaun sira no sei garante seguransa ema hotu,” Sebastião Alves tenik.
Biban ne’e, Komandante Polísia husu ba komunidade atu tau nafatin konfiansa ba Autoridade seguransa tanba órgaun ne’e mak sei hamriik defende ema hotu nia diretu liberdade.
Jornalista : Vitorino Lopes da Costa
Editora : Julia Chatarina
