DILI, 09 juñu 2023 (TATOLI)–Partidu Congresso Nacional Reconstrução de Timorense (CNRT) no Partidu Demokrátiku (PD) aseita ho kalendáriu ne’ebé mak Prezidente Parlamentu Nasionál no Prezidente Repúblika deside ona.
“Partidu CNRT no PD hala’o enkontru semi formál ho Prezidente Repúblika hodi ko’alia kona-ba kalendáriu, ne’ebé partidu rua dehan ba Prezidente Repúblika katak ami aseita loron 22 juñu Parlamentu komesa ninia sesaun dahuluk lejizlativa foun,” Prezidente Partidu CNRT, Kayrala Xanana Gusmão, hateten hafoin hamutuk ho estrutura partidu CNRT no PD halo reuniaun ho Xefe Estadu iha Palásiu Prezidensiál, Bairru Pité, sesta ne’e.
Notísia relevante : PD preparadu hamutuk ho CNRT forma Governu
Tuir kalendáriu, iha loron 22 juñu 2023 realiza sesaun dahuluk lejizlatura foun, iha 23 juñu hanesan loron daruak plenária Parlamentu Nasionál hodi re-inísiu plenária, verifika no konfirmasaun kandidatura, votasaun no eleisaun Prezidente Parlamentu Nasionál, pasajen kadeira Prezidente foun hosi Prezidente sesante no diskrusu Prezidente Parlamentu Nasionál foun, iha loron 26 juñu hanesan loron datoluk plenária ba eleisaun Vise-Prezidente Parlamentu Nasionál no Sekretária.
Enkuantu, iha loron 29 juñu Prezidente Repúblika konvoka enkontru ho Primeiru-Ministru indijitadu, iha 30 juñu publika dekretu Prezidente Repúblika, no loron 01 jullu 2023 loron ba pose ba IX Governu Konstitusionál, ne’ebé sei realiza iha Palásiu Prezidensiál Bairru Pité iha tuku 16:00.
Jornalista : Antónia Gusmão
Editora : Julia Chatarina
