VIQUEQUE, 16 juñu 2023 (TATOLI)-–Diretór Servisu Edukasaun munisípiu Viqueque, Domingos Brandão, agradese ba Programa Nasionál Dezenvolimentu Suku (PNDS), ne’ebé harii ona edifísiu pre-eskolár ba estudante sira iha suku Fatudeder, postu administrativu Viqueque vila, munisípiu Viqueque.
“Ha’u agradese tebes ba PNDS no Autoridade suku Fatudere ne’ebé tau interese boot ba edukasaun tanba programa suku sira hatama mós edukasaun hodi harii ona edifísiu pre-eskolár ida,” Domingos Brandão hateten ba Agência Tatoli, iha ninia knaar fatin, Beloi, sesta ne’e.
Nia konsidera, Autoridade suku Fatudere sai ezemplár ba suku hotu tanba programa hosi PNDS tau hotu ba setór edukasaun no agora tau nafatin prioridade halo morru protesaun ba pre-eskolár.
“Eskola pre-eskolár foin lalais iha tersa (13/06) halo inaugurasaun hodi entrega ba ami hodi hala’o prosesu aprendizajen. Hosi pre-eskolár, iha sala aula hamutuk tolu, sala rua ba aula no sala ida uza ba profesór, ne’ebé gasta orsamentu $39.000,” nia akresenta.
Notísia relevante : Servisu Edukasaun Viqueque husu estudante bolsa méritu kompleta dokumentu
PNDS harii edifísiu maibé fasilidade kadeira no meza seidauk, nune’e parte edukasaun sei esforsu hodi kompleta fasilidade eskolár.
“Hanesan sasán urjente no mobiliáriu sira ami oferese ona ba profesór sira hodi uza iha eskola, maibé ba fasilidade kadeira no meza ha’u sei husu ajuda ba ajénsia sira,” nia tenik.
Tuir dadus estudante hosi eskola pre-eskolár hamutuk na’in-40, ne’ebé fahe ba sala-rua no profesór kontratadu na’in-rua maka hanorin iha pre-eskolár.
Jornalista : Vitorino Lopes da Costa
Editora : Julia Chatarina
