DILI, 06 jullu 2023 (TATOLI) – Ministru Negósiu Estranjeiru no Kooperasaun (MNEK) Bendito Freitas, dehan Governu Japaun mantein reforsa kooperasaun ho Timor-Leste iha área importante oioin.
“Ita iha vizita ida hosi Ministru Estadu Asuntu Negósiu Estranjeiru Japaun nian Takei Sunsuke atu ko’alia kona-ba oinsa hametin liután ita-nia kooperasaun bilaterál entre nasaun rua liuliu área barak ne’ebé Japaun sempre ajuda, hanesan ajuda orasamentu no konstrusaun barak”, Freitas dehan ba jornalista sira iha edifísiu MNEK, ohin.
Nia dehan, tuir dadus ne’ebé Japaun iha, hahú Timor-Leste hetan independénsia apoiu ona orsamentu ba dezenvolvimentu hamutuk millaun $315, apoiu ba asisténsia téknika hamutuk millaun $128 no apoiu empréstimu atu hadia Aeroportu Internasionál Prezidente Nicolau Lobato Comoro hamutuk millaun $40.
Governu Japaun komprometidu sei la hakotu nia apoiu ba Timor-Leste, tanba iha tempu besik sei apoiu tan formasaun téknika ba joven timoroan ne’ebé hakarak aprende iha área saida de’it.
Iha vizita ne’e, atu felisita mós ba Governu foun ne’ebé lideradu hosi Primeiru-Ministru Kay Rala Xanana Gusmão.
Jornalista: Hortencio Sanchez
Editór : Zezito Silva
