VIQUEQUE, 14 jullu 2023 (TATOLI)—Postu saúde Ulusu, suku Matahoi, postu administrativu Uatulari, munisípiu Viqueque rejista moras Infensaun Vias Respiratóriu Aguda (ISPA) hamutuk 284 iha fulan-janeiru to’o jullu tinan ne’e.
Tuir reprezentante pesoál saúde iha postu saúde Ulusu, Luís Menezes da Costa, durante fó konsulta ba pasiente sira iha trimestre dahuluk to’o daruak, rejista moras ISPA barak liu kompara ho moras seluk.
“Moras ISPA rejista barak tanba impaktu hosi poluisaun, ambiente no konsumu bee matak. Depois pasiente konsulta, ami fó ai-moruk hanesan paracetamol no amoxicillin hodi pasiente sira konsumu no rekupera moras,” Luís Menezes da Costa, hateten ba Agência Tatoli, iha postu saúde Ulusu, sesta ne’e.
Notísia relevante : Ospitál Internamentu Viqueque rejista kazu ISPA hamutuk 8.110 durante fulan-ualu
Aleinde ne’e, bainhira abitante sira iha área rurál sente mear baibain, sira lakohi hakbesik ba fasilidade saúde tanba sira konsidera mear ne’e la’ós moras todan, tanba ne’e sira lakohi halo prevensaun.
“Iha ne’e ami hala’o programa saúde ba família tama sai abitante sira-nia uma no identifika iha abitante balun mear maibé sira lakohi hakbesik ba fasilidade saúde. Nune’e ami fó hanoin ba sira bainhira mear tenke ba halo tratamentu hodi halo prevensaun ba moras boot,” nia akresenta.
Daudaun stock ai-moruk hanesan paracetamol, amoxillin no seluk tan iha postu saúde Ulusu sufisente hela.
“Ami sempre hasoru dezafiu hanesan dalan ne’ebé liga ba postu Ulusu ho kondisaun a’at, nune’e iha tempu stock ai-moruk hotu, ami tenke tun ba sentru saúde Uatulari ne’ebé presiza sempre hakur mota. Tempu bai-loron di’ak, maibé tempu udan ami susar tebes. Nune’e ami tenke pasiénsia bainhira ai-moruk hotu hodi fó atendimentu ba pasiente sira. Distánsia hosi postu Ulusu to’o sentru saúde vila kilómetru 31, bainhira rai maran ami ho motorizada, maibé iha tempu udan ami tenke la’o ain maka lalin ai-moruk ba fali postu saúde,” nia dehan.
Tuir dadus, moras seluk ne’ebé rejista iha postu saúde Ulusu hanesan diareia 35, pneumonia 14, gastritis 30 no dermatitis 59.
Jornalista : Vitorino Lopes da Costa
Editora : Julia Chatarina
