DILI, 19 jullu 2023 (TATOLI)—Eletricidade de Timor-Leste, Empreza Públika (EDTL, E.P) iha tempu badak sei halo instalasaun sistema pre-pagu foun ba kliente sira.
Liga ba kestaun ne’e, Komisáriu Ezekutivu Servisu Tékniku EDTL, E.P, Latino Jerónimo, tersa (18/03) ne’e halo ona enkontru ho empreza CNI22 JV Shenzhen Clou Electronics inklui Péritu kontadór hosi Banku Dezenvolvimentu Aziátiku (ADB, sigla inglés), Project Supervision Consultant (PSC), SMEC International hodi ko’alia kona-ba konfigurasaun no instalasaun sistema pre-pagu foun.
“Ha’u husu ba enjiñeiru sistema pre-pagu EDTL, E.P nian daudaun ne’e la’o ho di’ak, maibé presiza atualiza lalais instala sistema pre-pagu foun ne’e hodi labele fó impaktu ba kliente sira. Instalasaun sistema foun ne’e ho hi-tech ho kompleksidade a’as tebes, nune’e husu ba parte hotu atu servisu hamutuk hodi asegura servisu la’o ho di’ak no susesu,” Komisáriu Ezekutivu hateten liuhosi nota ne’ebé Agência Tatoli asesu, kuarta ne’e.
Notísia relevante : EDTL,E.P simu kontadór pre-pagu faze dahuluk hamutuk 5.000 hosi kompañia
Komisaun Nasionál Aprovizionamentu, (CNA, sigla portugés) loke konkursu públiku ba projetu instalasaun sistema pre-pagu foun hanaran ‘supply and delivery of prepaid and AMR meters, accessories, and related services’ inklui kontadór hamutuk unidade 51.900, servidór no armazementu ba sistema pre-pagu.
Projetu ne’e lansa iha juñu 2022, maibé prosesu aprovizionamentu foin finaliza iha maiu 2023 ho kustu millaun $4,09, ne’ebé finansia hosi Fundu Empréstimu hosi ADB, liuhosi Power Distribution Modernization Project (PDMP) ne’ebe Governu Timor-Leste asina akordu iha tinan 2021 no efetivu iha marsu 2022.
Projetu PDMP ho totál orsamentu millaun $50, kompostu hosi ADB millaun $35 no Fundu Kontra Partida millaun $15, ho objetivu halo melloramentu ba rede distribuisaun hodi redús perda no hadi’a konfiabilidade eletrisidade, nune’e eleva kapasidade rekursu umanu EDTL nian.
Impaktu hosi serbisu ne’e mak asesu konfiável no reziliénte ba eletrisidade, aliñadu tuir Planu Estratéjiku Dezenvolvimentu Nasionál (PEDN) 2011.
Hafoin diskusaun, ekipa mós halo vizita ba TIC Timor, I.P hodi diskute hamutuk halo preparasaun hodi asegura seguransa ba instalasaun sistema.
Jornalista : Arminda Fonseca
Editora : Julia Chatarina
