DILI, (TATOLI) – Ministru Reforma Lejislativa no Asuntu Parlamentár (MRLAP), Fidelis Leite Magalhães, hatete Kamara Konta (CdC-sigla portugés) iha responsabilidade atu halo audit ba prosesu jestaun iha ezekusaun orsamentu jerál Estadu.
“Ami membru Governu mós la-hatene detalla jeolojia kompara ho sira (ANPM ho Timor Gap), sira mak espesialista iha sira nia área”, hatete nia bainhira hatan preokupasaun deputada opozisaun hosi bankada FRETILIN, Angélica da Costa Rangel, durante plenária segunda ne’e.
Fidelis hatutan: “Ita iha pontu relevante ne’ebé ita foti kona-ba ezekusaun orsamentu, prosesu jestaun, buat ne’e iha dalan ne’ebé lei fó, ita bele halo audit no Camara de Contas bele iha responsabilidade, dever no poder atu haree tuir forma prévia ou bainhira ezekusaun ba gastu hotu ne’ebé uza osan Estadu”.
Fidelis Leite Magalhães realsa timoroan sira agora dadauk iha Timor Gap, EP no Autoridade Nasionál Petróleu no Minarai (ANPM) hanesan ema ne’ebé kualifikada iha sira nia área.
Deputada Angélica Rangel kestiona kapasidade Timor Gap nu’udar jestór ba investimentu petrolíferu, tanba seidauk tuir padraun prátika indústria mina no gás.
“Razaun ne’ebé halo ami ladun fiar kapasidade téknika Timor Gap,EP no Autoridade Nasionál Petróliu no Minerais (ANPM), tanba sira la’ós kompañia ne’ebé kualifikada no hetan ona sertifikasaun husi Gaffney, Cline & Associates (empreza no konsultóriu ba petróliu), DeGolyer & MacNaughton no seluk tan, tuir padraun prátika indústria mina no gas nian”, komenta.
Nia hatutan: “Atu kuantifika no públika kategoria no montante númeru reserva ba públiku, no aat liután uza hodi influénsia orgaun soberanu sira hanesan Prezidente Repúblika, Parlamentu Nasionál, Governu ho Estadu tomak hodi foti desizaun ne’ebé prejudika futuru Estadu RDTL no povu Maubere tomak nian”.
Antes ne’e iha semana kotuk Ministra Finansa en ezersísiu, Sara Lobo Brites, halo aprezentasaun iha plenária Parlamentu Nasionál (PN) kona-ba regra, kritériu, selesaun, jestaun no avaliasaun investimentu.
“Fundu petrolíferu bele aplika direitamente iha operasaun petrolífera iha territóriu nasionál ou estranjeiru, liuhosi selebrasaun transaksaun komersiál sira husi intermédiu Timor Gap, Ep tuir termu n.º 4 do artigu 15.º da Lei n.º 9/2005, de 3 de agostu, ne’ebé públika husi lei númeru 12/2011, de 28 setembru”, dehan.
Jornalista: Julia Chatarina
Editora: Rita Almeida
