BAUCAU, 16 agostu 2023 (TATOLI) – Servisu Autónomu Medikamentu Ekipamentu Saúde, Institutu Públiku (SAMES, O.P) liuhosi orsamentu retifikativu prevee orsamentu hamutuk milaun $6-resin hodi kompra ai-moruk.
Diretór Ezekutivu SAMES,I.P, Santana Martins, esplika, ai-moruk atuál nível nasionál menus pursentu 21 no nível rejionál pursentu 29 katak hosi item 402, ai-moruk item 100 mak laiha, situasaun ne’e akontese tanba kuantidafe ai-moruk la sufisiente.
“Ita asesu tán fundu orsamentu retifikativu milaun $6, espera Parlamentu bele autoriza atu tempu fulan-haat mai bele ezekuta osan ne’e hodi rezolve aimoruk stock out durante ne’e akontese,” Diretór Ezekutivu SAMES, Santana Martins hateten iha Vila Nova, kuarta ne’e.
SAMES hasoru dezafiu iha orsamentu hodi kompara ai-moruk tanba impaktu hosi aumenta médiku espesialista no médiku jerál sira iha ospitál.
Alende ne’e, rekoñese falla iha jestaun balun ne’ebé sei buka hodi solusiona internalmente tanba impkatu hosi parte legál hanesan rejime aprovizonamentu kompra ai-moruk ne’ebé Governu halo ona revoga.
Nune’e prosesu aprovizonamentu jerál hateten bainhira orsamentu liuhosi milaun $1 tenki liuhosi Komisaun Nasionál Aprovizonamentu (CNA, sigla portugés).
Santana Martins, argumenta, prosesu aprovizonamentu atu sosa ai-moruk aselera tenke diferente ho projetu seluk tanba lais liu fulan-ualu hanesan orsamentu multianual nune’e kada tinan kompra ai-moruk hosi tinan tuan sei utiliza ba tinan foun.
“Espera IX Governu bele konsidera tau prioridade liuliu asuntu aprovizonamentu no orsamentu nune’e neineik ba beibeik to’o 2025 ita bele ko’alia,” Santana Martins akresenta.
Problema menus ai-moruk enfrenta mós iha Ospitál Referál Eduardo Ximenes (HorEX, sigla portugés) hanesan analgesik liuliu tableta kompostu buskopan, ibuprofen, diknofenak no inzeksaun uniku diklofenak mak iha maibé mínimu.
Alende ne’e, antibioteka laiha ai-moruk ampeselin, ai-moruk ba iis-boot hanesan hidrokortison no kanula tipu númeru 20,22 no 24 ne’ebé menus besik fulan-haat ona.
Jornalista : Natalino Belo
Editór : Evaristo Soares Martins
