COVALIMA, 30 agostu 2023 (TATOLI)–Governu liuhosi Sekretáriu Estadu Dezenvolvimentu Lokál, Mateus dos Santos Tallo, entrega sertifikadu rekoñesementu hosi ordem komandante em Xefe FALINTIL, Kay Rala Xanana Gusmão ba membru Movimentu ka Dewan Solidaritas Mahasiswa Pemuda dan Pelajar Timor Timur (DSMPPTT) iha Covalima ne’ebé hola parte iha luta ba libertasaun nasionál.
“Ohin, ita-nia movimentu universitáriu DSMPPTT na’in-74 simu sertifikadu rekoñesinementu ordem komandante em Xefe FALINTIL, Kay Rala Xanana Gusmão,” Mateus dos Santos Tallo hateten liuhosi nia diskursu bainhira sai inspetór serimónia isar bandeira hodi komemora loron konsulta popular ba dala-24 (30 agostu 1999-30 agostu 2023), iha Suai Loro, kuarta ne’e.
Governante ne’e hateten, Dewan Solidaritas Mahasiswa Pemuda dan Pelajar Timor Timur merese atu respeitu hodi kontinua banati tuir sira-nia ain fatin, hodi refleta espiritu ativizmu no eroizmu aas ba Timor-Leste nia futuru di’ak.
“Timoroan nia ukun rasik aan la atinje bainhira la apoiu hosi ita-nia belun hosi rai-li’ur, nune’e ita la haluha presenza hosi UNAMET, Polisia Nasaun Unida hodi fó seguransa ba timoroan, jornalista no ativista hosi rai seluk sira-nia espíritu sakrifisiu metin,” nia hateten.
Primeiru Vise Prezidente Dewan Solidaritas Nasionál, Francisco Mariano dos Santo, hateten Dewan Solidaritas Mahasiswa Pemuda dan Pelajar Timor Timur hamriik ho prinsípiu atu buka ukun rasik aan ne’ebé sosa ho karun.
“Dewan Solidaritas Mahasiswa Pemuda dan Pelajar Timor Timur hamrrik ho liafuan ida de’it, ita hotu hakarak ukun rasik aan ne’ebé ita sosa ho karun,” nia dehan.
Nia mós hato’o agradesimentu ba VIII Governu Konstitusionál ne’ebé halibur DSMPPTT nia konsolidasaun no mós hato’o bem-vundu ba IX Governu ne’ebé lideradu hosi Primeiru-Ministru, Kay Rala Xanana Gusmão, hodi temi netik Dewan Solidaritas Mahasiswa Pemuda dan Pelajar Timur Timur nia naran.
Antes ne’e, membru Dewan Solidaritas Mahasiswa Pemuda dan Pelajar Timor-Timur (DSMPPTT) hosi munisípiu Viqueque, Baucau no Bonaro mak simu ona sertifikadu no iha 30 agostu 2023 ne’e membru DSMPPTT hosi munisípiu Covalima, Ainaro, Aileu, Manufahi no Manatuto mak simu sertifikadu refere.
“Ha’u hanoin DSMPPTT nia luta sei la hotu, sei makaas liután. Se bainhira halo buat ne’ebé la loos, DSMPPTT kontra ba povu nia moris di’ak sei sei kontinua hala’o nafatin,” nia esplika.
Tuir dadus, dewan Solidaritas hOsi Munisípiu Covalima ne’ebé simu sertifikadu mai ousi postu administratu hitu hamutuk nain-74 no hosi númeru ne’e postu Fatululik na’in-haat (4), Fatumea na’in-lima (5), Fohorem na’in-13, Maucatar na’in-10, Suai na’in-11, Tilomar na’in-hitu (7) no Zumalai na’in-24.
Jornalista : Celestina Teles
Editór : Cancio Ximenes
