MALIANA, 11 setembru 2023 (TATOLI)-Estudante finalista hosi eskola Ensiñu Sekundáriu Tékniku Vokasionál númeru II Malibaka Yamato Maliana, segunda ne’e, tuir ona ezame prova aptidaun profesionál (PAP), tinan letivu 2023 ne’ebé hetan abertura hosi Diresaun Servisu Edukasaun Munisipál Bobonaro.
Tuir dadus estudante na’in-128 ne’ebé maka partisipa iha ezame mini-monografia ne’e maihosi departamentu komérsiu, akontabilidade no turizmu.
Notísia Relevante :Sala 11 iha ESTV Malibaca Bobonaro hetan estragus husi tufaun
Xefe Departamentu Ensinu hosi Diresaun Servisu Munisipál Edukasaun Bobonaro, Domingos Magno, husu ba finalista hotu-hotu atu partisipa ezame prova aptidaun profesionál (PAP) ne’e ho di’ak nune’e bele prepara aan liután iha ezame nasionál ba tinan letivu 2023.
“Ha’u nia-oan, alin sira hasoru ezame lalika hakfodak sai hanesan vokasaun kuandu imi ultra pasa ona hosi estájiu, signifika imi iha bukae oan ruma, hodi hasoru ezame PAP, maibé karik la tuir PAP entaun ita-bot sira-nia kelulusan ne’e iha ona, maibé sei tertunda, tanba ne’e kuidadu saúde halo didi’ak hodi tuir ezame, se lae ita-bot sira-nia esforsu tinan tolu sei sai fali ba tinan haat,” nia hateten.
Nune’e mós nia husu ba konsellu professór liuliu ezaminadór sira atu fó ezame ba estudante sira ho profesionál no neutru nune’e bele prepara estudante sira ho kualifikadu iha futuru.
“Ita sira ne’e mak rekursu umanu munisípiu ida ne’e nia no eskola ida ne’e atu ba oin ka ba kotuk presiza ita-boot sira-nia kontribuisauu kapasidade, ne’e duni ha’u enkoraja imi hotu tenke sólidu hodi atinje metas ne’ebé imi hakarak atu bele halo kompetisaun ho ETV sira iha munisípiu Bobonaro no ETV sira seluk iha Timor-Leste,”Nia enkoraja
Iha fatin hanesan Diretór ESTV númeru II Malibaka Yamato Maliana, Lazaro de Jesus Santos, hateten ezame PAP ne’e iha ona kurríkulu annuál, tanba ne’e, molok estudante finalista partisipa ezame nasionál ne’e sei tuir uluk ezame prova aptidaun professional (PAP).
Nia hateten estudante finalista ne’ebé tuir ezame PAP ne’e antes ne’e hala’o ona estájiu formasaun siéntifika traballu durante fulan ida iha Sekretariadu Estádu Formasaun Profesionál (SEFOPE), Institutu Apoia Dezembolvimentu Emprezariál (IADE) no instutuisaun relevante sira seluktán ne’ebé maka durante ne’e sai ona parseiru ESTV Malibaka nian.
“Depois estájiu sira sei halo relatóriu FST, hafoin ida ne’e sira tama iha PAP, kriteria atu tama PAP ne’e maka estudante sira tenke hakerek mini-monografia durante fulan ida hakerek tuir pájina de cover, depois ida ne’e tama iha agradesimentu ba abstratu, tama fali iha kapitulu I to’o III mak sira halo peskiza loron tolu, ida ne’e mak sai rezultadu dadus para hodi hakat ba ezame PAP,” Lazaro hateten.
Nune’e mós Diretór IADE munisípiu Bobonaro, Elias Cardoso hateten IADE hanesan parseriu ESTV Malibaka nian, tanba ne’e bainhira estudante finalista sira ne’ebé maka la kontinua estudu iha ensinu superiór sira atu hakbesik aan ba IADE hodi rejistu atividade balun ne’ebé liga ho programa kompetisaun Planu Negósiu Inovativu no Programa Fasilidade Inovativu Negósiu ne’ebé maka IADE hala’o kada tinan.
“Ita eskola la signifika hotu-hotu aban-bainrua sai funsionáriu, labele hanoin ida ne’e tanba kualker atividade ne’e servisu, entaun ita tenke kapasita-aan atu bele halo atividade seluk ne’ebé mak bele hetan rendimentu tanba ita funsionáriu mós buka osan, ita servisu baibain mós buka osan, Nia dehan
Notísia Relevante :MEJD prepara BOQ reabilita ESJTV Malibaca Bobonaro
Jornalista: Sergio da Crúz
Editór: Agapito dos Santos
